झापामा सम्पन्न पाँचौँ संस्करणको झापा गोल्डकप फुटबलको उपाधि विभागीय टोली त्रिभुवन आर्मी क्लबले जितेको छ ।
सोमबार भएको फाइनल खेलमा घरेलु टोली झापा-११ लाई २-१ गोल अन्तरले हराउँदै आर्मी च्याम्पियन बनेको हो ।
बिर्तामोडस्थित डोमालाल राजवंशी रंगशालामा आर्मीलाई जित दिलाउन टेक बहादुर बुढाथोकी र जर्ज प्रिन्स कार्कीले एक एक गोल गरे ।
झापाका विमल घर्तीमगरले एक गोल फर्काए ।
खेलको १८औं मिनेटमा टेक बहादुरले आर्मीलाई सुरुआती अग्रता दिलाएका थिए ।
सुमन अर्यालको क्रस पासमा टेकबहादुरले उत्कृष्ट फिनिस गरे ।
त्यसको ३ मिनेट नबित्दै कप्तान जर्ज प्रिन्सले आर्मीको अग्रता दोब्बर बनाए ।
गोलरक्षक र डिफेन्सको तालमेल नमिल्दा जर्जप्रिन्सले जाली चुमाए ।
गोलरक्षक दिप कार्की अघि बढेको मौकामा उनले गोल गरेका थिए ।
त्यसपछि खेलको २४ औं मिनेटमा झापाका विमलले गोल अन्तर कम बनाए ।
उर्लिचको क्रसपासमा अनमार्क बिमलले हेडर माफर्त गोल गरे ।
दोश्रो हाफका दुवै टोलीले केही राम्रा अवसर बनाएपनि सदुपयोग गर्न सकेनन् ।
सेमिफाइनलमा ए डिभिजन क्लब सातदाेबाटाे युथ क्लबलाई हराउँदै आर्मी फाइनल प्रवेश गरेकाे थियो भने झापाले सेमिफाइनलमा सङ्कटालाई पाखा लगाएकाे थियाे ।
आयाेजक झापा प्रतियाेगिताकाे हरेक संस्करणकाे फाइनल पुग्ने एकमात्र टाेली थियो ।
पाँचाैँ संस्करणसम्म आइपुग्दा चार पटक फाइनल पुगे पनि झापाले उपाधि जित्न सकेकाे थिएन ।
यसपालि पनि उसको हात खाली भयो ।
यता, झापाकाे प्रतिद्वन्द्वी आर्मी भने प्रतियाेगिताकाे सर्वाधिक सफल टाेली हाे ।
यस संस्करणको उपाधि जितेसँगै उसले चाैथो पटटक गाेल्डकपको उपाधि जितेको छ ।
यस संस्करणको झापा गोल्डकपको उपाधि विजेताले नगद १२ लाख ५५ हजार र उपविजेताले ६ लाख पाँच हजार रुपैयाँ नगद पाए ।
त्यसबाहेक व्यक्तिगत विधातर्फ उत्कृष्ट गाेलरक्षक, डिफेन्डर, मिडफिल्डर र प्रशिक्षकलाई नगद २१ हजार रुपैयाँ दिइनेछ ।
प्रतियाेगिता आयोजक समिति अध्यक्ष विनोद बस्नेतका अनुसार प्रतियाेगिताका सर्वाधिक गाेलकर्तालाई नगद २५ हजार दिइनेछ भने प्रतियोगिताको सर्वोत्कृष्ट खेलाडीले एक थान मोटरसाइकल पाउने छन् ।
फाइनल खेल हेर्न नेपाली पुरुष राष्ट्रिय फुटबल टाेलीका मुख्य प्रशिक्षक अब्दुल्लाह अलमुताइरी समेत झापा आएका थिए ।
यो पनि :
