काठमाडौं । शिक्षा तथा खेलकुदमन्त्री सस्मित पोखरेलले विश्व फुटबल महासंघ (फिफा) र एसियाली फुटबल महासंघ (एएफसी) का शीर्ष अधिकारीहरूसँग भेटवार्ता गरेका छन् । थाइल्यान्डको बैंककमा आयोजित एएफसी अवार्ड्सका अवसरमा मन्त्री पोखरेलले फिफा अध्यक्ष जियानी इन्फान्टिनो, महासचिव माटियास ग्राफस्ट्रोम र एएफसी अध्यक्ष शेख सलमान बिन इब्राहिम अल खलिफासँग भेट गरेका हुन् ।
भेटका क्रममा मन्त्री पोखरेलले नेपाली फुटबलको वर्तमान अवस्था र अखिल नेपाल फुटबल संघ (एन्फा) माथि लागेको प्रतिबन्धको विषयमा छलफल गरेका थिए । उनले फिफा र एएफसीका प्रतिनिधिहरूलाई नेपाली पक्षबाट उपहारसमेत प्रदान गरेका थिए ।
मन्त्री पोखरेलका अनुसार छलफलमा एन्फाको कानुनी प्रक्रिया, तहगत निर्वाचन र निलम्बन फुकुवाका विषयमा कुराकानी भएको थियो । एन्फामाथि लागेको प्रतिबन्ध हटाउने विषयमा फिफा र एएफसीका अधिकारीहरू सकारात्मक देखिएको उनले बताएका छन् ।
यसअघि एन्फाले आफ्नो संगठनभित्र तहगत निर्वाचन गर्ने सहमति जनाएको थियो । त्यसपछि राष्ट्रिय खेलकुद परिषद् (राखेप) ले पनि एन्फामाथि लगाएको प्रशासनिक तथा आर्थिक प्रतिबन्ध फुकुवा गर्ने निर्णय गरिसकेको छ ।
राखेपले प्रतिबन्ध हटाएसँगै अब फिफाले पनि एन्फामाथिको निलम्बन फुकुवा गर्ने विषयमा मौखिक सहमति जनाएको मन्त्री पोखरेलको भनाइ छ । यद्यपि, फिफाबाट औपचारिक निर्णय र आवश्यक प्रशासनिक प्रक्रिया पूरा हुन बाँकी छ ।
फिफाले समेत प्रतिबन्ध फुकुवा गरेमा नेपाली फुटबलले अन्तर्राष्ट्रिय प्रतियोगिता र गतिविधिमा भोगिरहेको अवरोध हट्ने अपेक्षा गरिएको छ । यसले नेपाली फुटबलको अन्तर्राष्ट्रिय सहभागिता र नियमित गतिविधि सञ्चालनका लागि बाटो सहज बनाउने विश्वास गरिएको छ ।
राखेपले एन्फामाथिको प्रतिबन्ध हटाइसकेको र फिफासँगको छलफल पनि सकारात्मक भएको भनिएसँगै नेपाली फुटबलमा देखिएको अन्योल अन्त्य हुने संकेत देखिएको छ ।