विराटनगर । मोरङको कानेपोखरी गाउँपालिकाको कार्यालयमा कार्यरत कार्यालय सहयोगी कारबाहीमा परेका छन् ।
अनुमतिबिना आफ्नो कार्यालयको ढोका खोलिदिएको भन्दै कानेपोखरी गाउँपालिकाकी अध्यक्ष राजमति इङ्नामले कार्यालय सहयोगी पदमप्रसाद भट्टराईलाई निलम्बन गरेकी हुन् ।
आफू बाहिर भएको बेला अनुमतिबिना आफ्नो कार्यकक्षको ढोका खोलेको भन्दै इङ्नामले कार्यालय सहयोगी भट्टराईलाई निलम्बन गरेकी हुन् ।
अध्यक्ष इङ्नाम र उपाध्यक्ष भोला अधिकारीबीच भएको विवादको मारमा कार्यालय सहयोगी भट्टराई फरेका हुन् ।
केही दिनअघि बसेको कार्यपालिका बैठकमा उपाध्यक्ष अधिकारी र वडा नम्बर २ का वडाध्यक्ष सुशील बुढाथोकीबीच चर्काचर्की परेको थियो ।
अध्यक्षको कार्यकक्षमा बसेको बैठकमा विवाद बढ्दै जाँदा उपाध्यक्ष अधिकारीले मुड्की बजारेर सिसाको टेबल फुटाएका थिए ।
अध्यक्ष तेह्रथुम गएको बेला गत बिहीबार उपाध्यक्ष अधिकारीले कार्यालय सहयोगी भट्टराईलाई सिसा फेर्न निर्देशन दिएका थिए ।
अध्यक्षले कार्यकक्षको ताला नखोल्न निर्देशन दिएकोले उनको सचिवालयमा बस्ने कार्यालय सहयोगीले सुरुमा ताला खोल्न मानेका थिएनन् ।
कार्यालय सहयोगी भट्टराईले भने, ‘उपाध्यक्षले भने पनि नखोल्न भनेर अध्यक्षज्यूले भन्नुभएको थियो । तर, उहाँहरू नभएको दिन उपाध्यक्षले अध्यक्षको कोठा खोल्न भन्नुभयो र बाध्य भएर मैले खोलेको हुँ ।’
सोही प्रकरणमा आफ्नो अनुमतिबिना कार्यकक्षको ढोका खोलेको भन्दै अध्यक्षले निलम्बन गरेपछि भट्टराईको गुजारामै समस्या परेको छ ।
उपाध्यक्ष अधिकारीले भने अध्यक्षसँग सल्लाह नै गरेर सिसा फेर्ने सहमति भएको दाबी गर्दै कुनै कर्मचारीलाई कारबाही नगरिएको जिकिर गरेका छन् ।
गाउँपालिकाका प्रवक्ता तथा वडा नं २ का वडाध्यक्ष बुढाथोकीले कार्यालय सहयोगीलाई निलम्बन गरेको भए पनि निष्काशन नगरेको बताए ।
