विराटनगर । मोरङको विराटनगर महानगरपालिकाले बिहीबार (भोलि) बिदा दिएको छ । मोटरसाइकल दुर्घटनामा परी कर्मचारीको मृत्यु भएपछि महानगरपालिकाले अत्यावश्यक सेवाबाहेकमा बिदा दिएको हो ।
मंगलबार राति मोरङको ग्रामथान गाउँपालिकामा बिजुलीको पोलमा मोटरसाइकल ठोक्किँदा विराटनगर–३ नम्बर वडा कार्यालयमा कार्यरत कर्मचारीको मृत्यु भएको थियो ।
मृत्यु हुनेमा कटहरी गाउँपालिका–७ का ३२ वर्षीय मनोज विश्वास रहेको राजमार्ग सुरक्षा तथा कोशी प्रदेश ट्राफिक व्यवस्थापन कार्यालय, इटहरीले जनाएको छ ।
हिजो बेलुका ८ः१० बजेतिर ग्रामथान-२ सुखानी खोला छेउमा झोराहाटबाट थलाहातर्फ जाँदै गरेको को २३ प ४९ नम्बरको मोटरसाइकल दुर्घटना भएको थियो ।
आफैं अनियन्त्रित भई मोटरसाइकल बिजुलीको पोलमा ठोक्किएपछि चालक विश्वास गम्भीर घाइते भएका थिए ।
टाउकोमा चोट लागेका विश्वासलाई विराटनगरस्थित कोशी अस्पताल पुर्याइएको थियो । तर, बेलुका पौने ९ बजेतिर डाक्टरले मृत घोषणा गरेको ट्राफिक प्रहरीले जनाएको छ ।
दुर्घटनामा परेको मोटसाइकल प्रहरी चौकी झोराहाटको नियन्त्रणमा रहेको छ । तीब्र गतिका कारण दुर्घटना भएको ट्राफिक प्रहरीको प्रारम्भिक अनुसन्धानले देखाएको छ ।
मादक पदार्थ सेवन गरे–नगरेको तथा सवारी चालक अनुमतिपत्र भए–नभएको भन्नेबारे अनुसन्धान भइरहेको ट्राफिक प्रहरीले जनाएको छ ।
चार वर्षयता ३ नम्बर वडा कार्यालयमा उनी आइटी शाखामा कार्यरत रहेको वडा सचिव हरिप्रसाद गुरागाईंले जानकारी दिए ।
‘कार्यालयको काम सकेर घर फर्किँदै गर्दा झोराहाटनजिक दुर्घटना परेर उहाँको दु:खद् निधन भएको छ,’ उनले भने, ‘यसैले भोलि महानगरपालिकाको कार्यालय र वडा कार्यालयहरूमा बिदा दिने निर्णय भएको हो ।’
विराटनगर महानगर प्रमुख नागेश कोइरालाका प्रेस संयोजक मीनकुमार श्रेष्ठका अनुसार भोलि अत्यावश्यक सेवाबाहेकका सेवाहरू बन्द रहने छन् ।
बिहीबार बिहान साढे १० बजे नगरपालिकाका कर्मचारी, वडासचिवहरू तथा कर्मचारी भेला भई शोकसभा गरेर अत्यावश्यक सेवाबाहेक बिदा दिने निर्णय उनको भनाइ छ ।
