भारतले पाकिस्तानलाई रोमाञ्चक प्रतिस्पर्धामा १ विकेटले हराउँदै यू–१९ एसिया कप क्रिकेटको उपाधि आफ्नो नाममा गरेको छ। ओमानको अल अमेरात क्रिकेट मैदानमा शनिबार भएको फाइनलमा अन्तिम बलमा लक्ष्य भेट्टाउँदै भारतले नवौँ पटक प्रतियोगिताको उपाधि जितेको हो।
पाकिस्तानले प्रस्तुत गरेको ३३८ रनको लक्ष्य पछ्याएको भारतले निर्धारित ५० ओभरमा ९ विकेट गुमाएर ३३९ रन बनायो। अन्तिम बलमा जितका लागि ३ रन आवश्यक हुँदा मोहित उल्वाले अहमद हुसेनको बलमा चौका प्रहार गर्दै भारतलाई ऐतिहासिक जित दिलाए।
भारतको जित सहज भने थिएन। टोली ४१.३ ओभरमा २५२ रन बनाउँदा ८ विकेट गुमाएर दबाबमा परेको थियो। त्यसपछि मोहित उल्वा र मनल चौहानले नवौँ विकेटका लागि ५७ रनको साझेदारी गर्दै टोलीलाई खेलमा फर्काए। मनलले ३२ बलमा ४७ रन बनाए।
मनल आउट भएपछि मोहितले चिगुरुपति वेंकटासँग अन्तिम विकेटका लागि अविजित ३० रन जोड्दै भारतलाई उपाधि दिलाए। मोहितले २६ बलमा ५ चौका र ३ छक्कासहित अविजित ४९ रन बनाए भने वेंकटाले ८ बलमा ११ रनको योगदान दिए।
भारतका कप्तान लक्ष्य रैचन्दानीले ८० रन बनाउँदा आर्यवीर सहवागले ५८ रन जोडे। अन्वय द्रविडले १९ र भीके विनिथले २४ रन बनाए। पाकिस्तानका रिजवानउल्लाहले ३ विकेट लिए।
यसअघि टस जितेर ब्याटिङ गरेको पाकिस्तानले ५० ओभरमा ९ विकेट गुमाएर ३३७ रन बनाएको थियो। उस्मान खानले १११ बलमा १०७ रनको शतकीय पारी खेले। अब्दुल कादिरले ८० र कप्तान फरहान युसुफले ६३ रन बनाए।
भारतका काव्या पटेलले ४ विकेट लिँदा चिगुरुपति वेंकटाले ३ विकेट लिए। अन्तिम क्षणसम्म रोमाञ्चक बनेको फाइनलमा जित निकाल्दै भारतले उमेर समूहको एसिया कपमा आफ्नो दबदबा कायम राखेको छ।
