विराटनगर । ससरकारसँग जारी संवादलाई व्यवस्थित, प्रभावकारी र निष्कर्षमुखी बनाउन मिटरब्याजविरुद्ध किसान-मजदुर आन्दोलनले औपचारिक वार्ता टोली गठन गरेको छ।
आन्दोलनरत पक्षका अनुसार सरकारसँग भइरहेका वार्तालाई संस्थागत, व्यवस्थित र परिणाममुखी बनाउने उद्देश्यले औपचारिक वार्ता टोली गठन गरिएको हो।
आन्दोलनका केन्द्रीय अध्यक्ष अवधेश कुशवाहाको संयोजकत्वमा गठन गरिएको टोलीमा केन्द्रीय महासचिव मनोजकुमार पासमान, केन्द्रीय प्रवक्ता रिजन राना मगर, केन्द्रीय हेडक्वार्टर सदस्य लक्ष्मी घिमिरे, केन्द्रीय हेडक्वार्टर सदस्य किरण परियार तथा संयुक्त जनअधिकार मोर्चाका केन्द्रीय अध्यक्ष निर्ग नवीन सदस्य रहेका छन्।
मिटरब्याज पीडितहरू असार २५ गतेदेखि जनकपुरधामबाट काठमाडौं केन्द्रित ‘पैदल न्याय मार्च’मा रहेका छन्। आन्दोलनका क्रममा सरकार र पीडित पक्षबीच निरन्तर संवाद भइरहेको छ।
हालसम्म बाराको निजगढमा गृहमन्त्री सुधन गुरुङको नेतृत्वमा सरकार र आन्दोलनरत पक्षबीच चार चरणको वार्ता सम्पन्न भइसकेको छ। तर आन्दोलनले अघि सारेका ६ बुँदे मागलाई लिखित रूपमा वैधानिकता दिने विषयमा सहमति हुन नसक्दा वार्ता अझै निष्कर्षमा पुग्न सकेको छैन।
मिटरब्याज पीडितहरूले आफ्ना माग सम्बोधन नभएसम्म आन्दोलन जारी रहने बताएका छन् भने सरकारले पनि वार्तामार्फत समस्या समाधान गर्ने प्रयास भइरहेको जनाएको छ।
