हेटौँडा । मकवानपुरको मनहरी गाउँपालिका–९ खरङ्गामा १६२ किलो ७९४ ग्राम अवैध लागूऔषध गाँजासहित दुई जना पक्राउ परेका छन्।
राक्सिराङको भावर हुँदै खरङ्गातर्फ आउँदै गरेको बा प्र ०१–०२५ च ०८७७ नम्बरको कारलाई ग२च ६१५ नम्बरको पिकअपले ‘स्कटिङ’ गर्दै ल्याइरहेको अवस्थामा इलाका प्रहरी कार्यालय मनहरीको टोलीले दुवै सवारी साधन नियन्त्रणमा लिएको हो।
जिल्ला प्रहरी कार्यालय मकवानपुरका प्रहरी नायब उपरीक्षक माधवप्रसाद काफ्लेका अनुसार कारको सिटमुनि लुकाएर ल्याइएको १३ पोका गाँजा बरामद गरिएको हो।
स्कटिङ गर्दै आएको पिकअप भाग्न खोजेपछि प्रहरीले नियन्त्रणमा लिएको थियो। पक्राउ पर्नेमा कार चालक चितवनको माडी नगरपालिका–५ धोबाहा निवासी ५६ वर्षीय देवनारायण महतो र पिकअप चालक भरतपुर महानगरपालिका–२४ निवासी ४८ वर्षीय टेकबहादुर दोङ रहेका छन्।
प्रहरी नायब उपरीक्षक काफ्लेले विशेष सूचनाका आधारमा इलाका प्रहरी कार्यालय मनहरीको टोलीले गाँजासहित दुईवटा सवारी साधन र चालकलाई नियन्त्रणमा लिएको जानकारी दिए। पक्राउ परेका दुवैजनामाथि थप अनुसन्धान भइरहेको प्रहरीले जनाएको छ।
