काठमाडौं । पूर्वउपसभामुख एवं प्रतिनिधिसभा सदस्य इन्दिरा रानामगरले बेलायतको संसद् (हाउस अफ कमन) की उपसभामुख क्यारोलिन नोक्ससँग भेट गरेकी छिन्।
बेलायत भ्रमणका क्रममा लण्डनस्थित हाउस अफ कमनमा भएको भेटमा रानाले नेपालमा आएको विनाशकारी बाढी र त्यसले पारेको प्रभावबारे जानकारी गराउँदै नेपालले पाउनुपर्ने न्याय तथा क्षतिपूर्तिको विषय उठाएकी हुन्।
पूर्वउपसभामुख रानाले नेपाल र बेलायतबीच ऐतिहासिक सम्बन्ध रहेको तथा बेलायतका लागि नेपाली गोर्खा सैनिकले ठूलो योगदान गरेको उल्लेख गर्दै नेपालको विपत्तिमा बेलायती संसद्ले सहयोग गर्ने अपेक्षा व्यक्त गरिन्। उनले नेपालको जलवायु न्यायका लागि आवाज उठाइदिन पनि उपसभामुख नोक्सलाई अनुरोध गरिन्।
भेटमा उपसभामुख नोक्सले नेपाल बेलायतको परिवारजस्तै रहेको बताउँदै विपद्को यस घडीमा आफूहरू नेपालसँगै रहेको धारणा राखिन्। उनले बेलायती संसद्मा नेपाललाई विशेष रूपमा हेर्नुपर्ने आवाज उठेको र सरकारले सहयोग घोषणा गरेको जानकारी गराइन्।
जलवायु परिवर्तनको मुद्दा सबै देशको साझा दायित्व भएको उल्लेख गर्दै नोक्सले नेपालको न्यायका लागि आफ्नो तर्फबाट सहयोग गर्ने प्रतिबद्धता पनि जनाइन्।
भेटमा संसदीय अभ्यास आदानप्रदानका विषयमा समेत छलफल भएको थियो। भेटमा बेलायत निवासी समाजसेवी रविन्द्रजंग लामिछाने पनि सहभागी थिए।
पूर्वउपसभामुख रानाले हाउस अफ कमनमा अन्य सांसदहरूसँग समेत भेट गरी नेपालले भोगेको विपत्ति र जलवायु न्यायबारे छलफल गरेकी थिइन्।
