काठमाडौँ । इन्डोनेसियामा अनाक क्राकाटाउ ज्वालामुखी विस्फोटपछि वायुमण्डलमा बाक्लो ज्वालामुखीय खरानी फैलिएसँगै आठ वटा विमानस्थलका उडान प्रभावित भएका छन्। उडान स्थगित हुँदा करिब १ लाख ७० हजार यात्रु अलपत्र परेका छन्।
ज्वालामुखीको खरानीको बादल फैलिएपछि अधिकारीहरूले राजधानी जाकार्तास्थित सोएकार्नो–हट्टा अन्तर्राष्ट्रिय विमानस्थलसहित आठ विमानस्थलका उडान स्थगित गरेका हुन्। यातायात मन्त्रालयका अनुसार कम्तीमा १ हजार ५५८ उडान प्रभावित भएका छन्।
शुक्रबार रातिदेखि सुरु भएको ज्वालामुखी विस्फोटका क्रममा लगातार भूकम्पीय कम्पन, लाभा तथा ठूलो आवाज सुनिएको थियो। आइतबार बिहान पुनः दुई पटक शक्तिशाली विस्फोट भएपछि उडान सुरक्षालाई ध्यानमा राख्दै विमानस्थलहरू बन्द गरिएको हो।
उडान स्थगनका कारण सिंगापुर, दोहा, सिड्नी र कुआलालम्पुरलगायत अन्तर्राष्ट्रिय गन्तव्यतर्फ जाने यात्रुहरू बढी प्रभावित भएका छन्।
इन्डोनेसियाका यातायात मन्त्री दुदी पुर्वागान्धीले एयरलाइन्सहरूलाई रद्द भएका उडानको रकम फिर्ता गर्ने प्रक्रिया छिटो गर्न तथा यात्रुलाई समयमै सूचना उपलब्ध गराउन निर्देशन दिएका छन्।
मौसम विज्ञान एजेन्सीका अनुसार ज्वालामुखीबाट निस्किएको खरानी करिब ५० हजार फिट उचाइसम्म पुगेको छ।
