विराटनगर । सुनसरीकाे देवानगञ्जलगायतका क्षेत्रमा देखिएका पछिल्ला घटनालाई लिएर राजनीतिक दलहरूले शान्ति र सद्भाव कायम गर्न संयुक्त अपिल जारी गरेका छन्।
रास्वपा सभापति रवि लामिछानेको पहलमा बसेको बैठकपछि ९ वटा दलका प्रमुख तथा प्रतिनिधिले ७ बुँदे अपिल सार्वजनिक गरेका हुन्।
अपिलमा राष्ट्रिय एकता र सामाजिक सद्भावको रक्षा गर्दै समस्याको शान्तिपूर्ण र दीर्घकालीन समाधानका लागि सरकार र समाजलाई सहयोग गर्ने प्रतिबद्धता व्यक्त गरिएको छ ।
दलहरूले उत्तेजना र अवाञ्छित गतिविधिबाट टाढा रहन नागरिकलाई आग्रह गर्दै आवेग र मुठभेडले समस्या थप जटिल बनाउने चेतावनी दिएका छन्।
साथै प्रदेश, जिल्ला र स्थानीय तहमा सर्वदलीय छलफल गरी विश्वासको वातावरण बनाउन आफ्ना कार्यकर्तालाई निर्देशन दिएका छन्।
