विराटनगर । सर्पदंशबाट एक बालकको उपचारका क्रममा मृत्यु भएपछि सिरहाको भगवानपुर गाउँपालिकामा तनाव उत्पन्न भएको छ।
उपचारमा ढिलाइ भएको र समयमै एम्बुलेन्स नपाएको आरोप लगाउँदै आक्रोशित स्थानीयले स्वास्थ्य केन्द्रमा तोडफोड गर्नुका साथै हुलाकी सडक अवरुद्ध गरेका छन्।
भगवानपुर गाउँपालिका–४ कल्याणपुरस्थित प्राथमिक स्वास्थ्य केन्द्रमा उपचारका लागि ल्याइएका सप्तरीको बलान बिहुल गाउँपालिका निवासी अरुण मण्डलका छोरा रोशन मण्डलको थप उपचारका लागि समयमै रिफर हुन नसकेको स्थानीयको आरोप छ।
परिवारका अनुसार बालकको अवस्था गम्भीर भएपछि थप उपचारका लागि अन्यत्र लैजान एम्बुलेन्स खोजिएको थियो। तर एम्बुलेन्स चालकले गाउँपालिका अध्यक्ष उग्र नारायण यादवको अनुमति बिना एम्बुलेन्स चलाउन नमिल्ने बताएपछि उपचार प्रक्रियामा ढिलाइ भएको दाबी गरिएको छ।
यही ढिलाइका कारण बालकको बाटोमै मृत्यु भएको आफन्तहरूले बताएका छन्।
घटनापछि आक्रोशित स्थानीयले प्राथमिक स्वास्थ्य केन्द्रमा तोडफोड गरेका छन्। उनीहरूले हुलाकी सडकमा टायर र दाउरा बालेर सडक अवरुद्ध गरेपछि यातायात सेवा प्रभावित भएको छ।
स्थानीयका अनुसार बिहान ११ बजे गाउँपालिका अध्यक्षसँग वार्ता गर्ने सहमति भए पनि अध्यक्ष वार्तास्थलमा उपस्थित नभएपछि आन्दोलन थप चर्किएको हो।
आन्दोलनका अगुवा प्रविन्द यादव र इन्दल मण्डलले गाउँपालिका अध्यक्ष वार्तामा नआएको भन्दै असन्तुष्टि जनाएका छन्।
घटनाको अवस्था नियन्त्रणमा लिन नेपाल प्रहरी र सशस्त्र प्रहरी बल परिचालन गरिएको छ।
