धनगढी । २४औँ सत्याग्रहमा रहेका प्राध्यापक डा. गोविन्द केसीको स्वास्थ्य अवस्था जटिल बन्दै गएको छ। शनिबार बिहान गरिएको स्वास्थ्य परीक्षणमा उनको रक्तमा सुगरको मात्रा अत्यन्त न्यून देखिएपछि चिकित्सकले तत्काल आईसीयूमा भर्ना गरी उपचार गर्न सुझाव दिएका छन्।
सेती प्रादेशिक अस्पतालका चिकित्सक डा. गजेन्द्र दुवालले गरेको परीक्षणमा डा. केसीको रक्तचाप ११०/९० र रक्तमा सुगरको मात्रा ५० रहेको पाइएको छ। यद्यपि, डा. केसीले आईसीयूमा भर्ना हुने विषयमा आफू विचार गर्ने बताएका छन्।
बिहीबारदेखि धनगढीस्थित कृष्ण मन्दिर धर्मशालामा पाँचबुँदे माग राख्दै अनसनरत केसीको स्वास्थ्य बिग्रिँदै गएको उनका सहयोगी अमृत जैशीले बताएका छन्। उनका अनुसार मांसपेशी बाउडिने, बोल्न कठिन हुने, हिँडडुल गर्न र शौचालय जानसमेत समस्या हुन थालेको छ।
यसबीच शिक्षा तथा खेलकुदमन्त्री सस्मित पोखरेलले सरकार डा. केसीका माग सम्बोधन गर्न तयार रहेको बताएका छन्। मन्त्री पोखरेलले वार्ता टोली गठन गर्ने र आवश्यक परे धनगढी आएर छलफल गर्ने प्रतिबद्धता जनाएको डा. केसीका सहयोगीले बताएका छन्।
