इटहरी । इलाका प्रहरी कार्यालय इटहरीको हिरासतमा रहेका एक थुनुवाको मंगलबार बिहान मृत्यु भएको छ। मृत्यु हुनेमा सुनसरीको इटहरी उपमहानगरपालिका–४ का ६८ वर्षीय गोपाल कार्की रहेका छन्।
प्रहरीका अनुसार कार्की बाल यौन दुरुपयोग मुद्दामा भदौ ५ गतेदेखि प्रहरी हिरासतमा थिए। मंगलबार बिहान हिरासतमा बेहोस अवस्थामा फेला परेपछि उनलाई उपचारका लागि धरानस्थित बीपी कोइराला स्वास्थ्य विज्ञान प्रतिष्ठान लगिएको थियो।
प्रतिष्ठान पुर्याएलगत्तै बिहान करिब ४ बजे चिकित्सकले कार्कीलाई मृत घोषणा गरेका थिए। सुनसरी प्रहरीका सूचना अधिकारी डीएसपी चन्द्रबहादुर खड्काले उपचारका क्रममा उनको मृत्यु भएको जानकारी दिए।
प्रहरीका अनुसार कार्कीको मृत्युको कारण खुल्न बाँकी छ। शव पोस्टमार्टमका लागि प्रतिष्ठानमै राखिएको छ। आवश्यक कानुनी प्रक्रिया पूरा गरेपछि शव परिवारलाई बुझाइने प्रहरीले जनाएको छ।
डीएसपी खड्काका अनुसार पोस्टमार्टम तथा अनुसन्धानपछि मात्रै मृत्युको यकिन कारण खुल्नेछ। प्रहरी हिरासतमा मृत्यु भएका कार्की नेपाल प्रहरीका पूर्वहवल्दारसमेत रहेको बताइएको छ।
