काठमाडौँ – राष्ट्रिय स्वतन्त्र पार्टी (रास्वपा)का सभापति रवि लामिछाने र भारतीय प्रधानमन्त्री नरेन्द्र मोदीबीच बुधबार नयाँ दिल्लीमा भेटवार्ता भएको छ। भेटमा नेपाल–भारत सम्बन्ध, द्विपक्षीय सहकार्य, व्यापार, पूर्वाधार, ऊर्जा तथा जनस्तरको सम्बन्ध विस्तारका विषयमा छलफल भएको बताइएको छ।
भेटपछि प्रधानमन्त्री मोदीले नेपालसँगको सम्बन्ध भारतको ‘नेबरहुड फर्स्ट’ नीतिको महत्वपूर्ण आधार भएको उल्लेख गर्दै दुई देशबीचको ऐतिहासिक, बहुआयामिक तथा विशेष सम्बन्धलाई अझ उचाइमा पुर्याउन भारत प्रतिबद्ध रहेको बताएका छन्।
सभापति लामिछानेले नेपाल र भारतबीचको साझा समृद्धि तथा उज्ज्वल भविष्यका लागि नजिकबाट सहकार्य गर्नुपर्ने आवश्यकता औँल्याएका थिए। त्यसप्रति सकारात्मक प्रतिक्रिया जनाउँदै मोदीले आगामी दिनमा दुवै देशबीच सहकार्य अझ विस्तार हुने विश्वास व्यक्त गरेका छन्।
भारत भ्रमणका क्रममा लामिछानेले भारतीय जनता पार्टी (भाजपा) का अध्यक्ष नितिन नवीन तथा अन्य उच्चस्तरीय भारतीय नेताहरूसँग पनि भेटवार्ता गरेका छन्। भ्रमणलाई नेपाल–भारत सम्बन्धलाई थप मजबुत बनाउने अवसरका रूपमा हेरिएको छ।
लामिछाने असार १ गते भारत भ्रमणमा गएका हुन्। भ्रमणका क्रममा भारतीय प्रधानमन्त्री मोदीसँग भेट हुने कार्यक्रम यसअघि नै तय गरिएको विभिन्न स्रोतहरूले उल्लेख गरेका थिए।
