विराटनगर । अविरल वर्षापछि आएको बाढीपहिरोले पाँचथरको याङवरक गाउँपालिकामा ठूलो क्षति पुर्याएको छ ।
गएराति आएको बाढीपहिरोका कारण वडा नम्बर १, २ र ३ मा घरगोठ, सडक, झोलुङ्गे पुल तथा जलविद्युत आयोजनामा क्षति पुगेको हो ।
याङवरक गाउँपालिकाका उपाध्यक्ष बाबा मेन्याङ्बोका अनुसार वडा नम्बर १ मा दुई वटा घर बग्नुका साथै वडा नम्बर १ र २ मा रहेका तीन वटा झोलुङ्गे पुल पनि बाढीले बगाएको छ । हालसम्म मानवीय क्षतिको विवरण प्राप्त नभएको र अहिले वर्षा रोकिएको उनले बताए ।
बाढीपहिरोले याङवरक-१ च्याङथापु बजार आसपासको क्षेत्रमा सबैभन्दा बढी क्षति पुर्याएको छ । निरन्तर वर्षाका कारण पुष्पलाल मध्यपहाडी लोकमार्गअन्तर्गत ओयाम–चिवाभञ्ज्याङ सडकखण्ड पूर्ण रूपमा अवरुद्ध बनेको छ । याङवरक–३ स्थित रिजाल भिरमा पहिरो खसेको छ भने वडा नम्बर २ को दोभाने क्षेत्रमा बनाइएको डाइभर्सन बाढीले पूर्ण रूपमा बगाएको छ ।
जिल्ला प्रहरी कार्यालय पाँचथरका प्रमुख प्रहरी नायब उपरीक्षक अनिषकुमार कर्णका अनुसार अवरुद्ध सडक सञ्चालनमा ल्याउने प्रयास भइरहेको छ । सीमा प्रहरी कार्यालय च्याङथापुले क्षतिको विवरण संकलन सुरु गरेको छ ।
यसैबीच, पाँचथरको हिलिहाङ गाउँपालिका र ताप्लेजुङको आठराई त्रिवेणी गाउँपालिकाको सीमास्थित तमोर करिडोरमा निर्माणाधीन लिम्बुनी सडक पुलको ट्रस पनि बाढीले बगाएको प्रहरीले जनाएको छ ।
हेँवा, काबेली र तमोर नदीमा पानीको बहाव बढेपछि तटीय क्षेत्र उच्च जोखिममा परेको छ । बाढीपहिरोका कारण याङवरक-३ ओयाम बजार आसपासका खेतीयोग्य जमिनमा समेत ठूलो क्षति पुगेको स्थानीयवासी तेजबहादुर योङ्याले बताएका छन् ।
