विराटनगर । यस वर्षको मनसुन अवधिमा देशका अधिकांश क्षेत्रमा सरदरभन्दा कम वर्षा हुने भएपनि बाढीको जोखिम कायमै रहेको जल तथा मौसम विज्ञान विभागले जनाएको छ ।
मनसुन अवधिमा कम बर्षा भइ लामो समयसम्म खडेरी लाग्दा एक्कासी बर्षा भएर बाढी पहिरो आउने जोखिम कायमै रहेको छ ।
यस बर्षको मनसुनमा कर्णाली प्रदेशका दक्षिणी भूभाग, लुम्बिनी प्रदेशका अधिकांश भूभाग, मधेस प्रदेशका पूर्वी भूभाग र कोसी प्रदेशका दक्षिणी भूभागमा सरदरभन्दा कम वर्षा हुने सम्भावना धेरै रहेको छ ।
त्यस्तैगरि सुदूरपश्चिम प्रदेशका उत्तरपूर्वी भूभाग, कर्णाली प्रदेशका उत्तरी भूभाग, लुम्बिनी प्रदेशका पश्चिमी भूभाग, कोसी प्रदेशका पूर्वी तथा दक्षिणी भूभागमा अधिकतम तापक्रमभन्दा बढी हुने सम्भावना रहेको समेत विभागले उल्लेख गरेको छ ।
