काठमाडौं — काठमाडौँ उपत्यकामा ट्राफिक नियम उल्लङ्घन गर्ने सवारी चालकविरुद्ध प्रहरीले कडाइ बढाएको छ। पछिल्लो २४ घण्टामा मात्रै एक हजार ८०६ चालक कारबाहीमा परेका छन्।
काठमाडौँ उपत्यका ट्राफिक प्रहरी कार्यालयका अनुसार कारबाहीबाट राज्यकोषमा १८ लाख ७६ हजार ५०४ रुपैयाँ राजस्व संकलन भएको छ।
कारबाहीमा पर्नेहरूमध्ये मादक पदार्थ सेवन गरेर सवारी चलाउने ७७ जना रहेका छन् भने नियमविपरीत ‘राइड सेयरिङ’ गर्ने १६२ जनालाई पनि ट्राफिक प्रहरीले नियन्त्रणमा लिएको छ।
त्यस्तै ट्राफिक संकेत उल्लङ्घन गर्ने १०६, तीव्र गतिमा सवारी चलाउने ८८, लेन अनुशासन नमानेका ८४ र निषेधित क्षेत्रमा हर्न बजाउने ३९ जनामाथि कारबाही गरिएको प्रहरीले जनाएको छ।
सडक पेटीमा पार्किङ गर्ने ७७ तथा एकतर्फी सडकमा सवारी चलाउने १११ जनासमेत कारबाहीमा परेका छन्। अन्य विभिन्न ट्राफिक नियम उल्लङ्घन गर्ने एक हजार ६२ जनालाई पनि जरिवाना गरिएको कार्यालयले जनाएको छ।
