काठमाडौं – विष्णुमति खोला किनारबाट चार थान पेस्तोल र ५८ राउण्ड गोली बरामद भएको छ।
काठमाडौं महानगरपालिका–१५ शोभाभगवती क्षेत्रमा सरसफाइका क्रममा महानगर र प्रहरीको टोलीले आइतबार बिहान उक्त हतियार फेला पारेको हो।
जिल्ला प्रहरी परिसर काठमाडौंका एसएसपी रमेश थापा का अनुसार घटनास्थलबाट टाइप–५४ मोडेलका चार थान पेस्तोल, ७ थान म्यागजिन र ९ एमएम बेरेटा पेस्तोलका ५८ राउण्ड गोली बरामद गरिएको छ।
विशेष सूचनाका आधारमा नेपाल प्रहरी अन्तर्गत प्रहरी वृत्त स्वयम्भूबाट खटिएको टोलीले हतियार नियन्त्रणमा लिएको हो।
प्रहरीले बरामद हतियार जेनजी आन्दोलनका क्रममा लुटिएको हुन सक्ने आशंका गर्दै थप अनुसन्धान अघि बढाएको जनाएको छ।
