काठमाडौं – प्रधानमन्त्री बालेन्द्र शाह (बालेन) को प्रेस तथा अनुसन्धान विज्ञ पदमा पत्रकार तथा लेखक दिपा दाहाल नियुक्त भएकी छिन्।
प्रधानमन्त्रीको सल्लाहकार तथा सचिवालय व्यवस्थापन कार्यविधि, २०७४ अनुसार शुक्रबार उनलाई उक्त पदमा नियुक्त गरिएको हो।
दुई दशकभन्दा लामो समयदेखि पत्रकारिता र प्राज्ञिक क्षेत्रमा सक्रिय दाहालले शुक्रबारदेखि नै आफ्नो कार्यभार सम्हालेकी छन्। उनले प्रधानमन्त्रीको सञ्चार रणनीति, मिडिया समन्वय र अनुसन्धान क्षेत्रमा महत्वपूर्ण भूमिका निर्वाह गर्नेछिन्।
भ्रष्टाचार नियन्त्रण, सुशासन र सामाजिक न्यायजस्ता विषयमा लामो अनुभव भएकी दाहाललाई सरकारको मुख्यधारमा जोड्ने उद्देश्यले यो नियुक्ति गरिएको हो।
दाहालसँग रेडियो, टेलिभिजन, छापा तथा अनलाइन माध्यममा २० वर्षभन्दा बढीको अनुभव छ। उनी पछिल्लो समय उकालो डटकममा वरिष्ठ संवाददाताको रूपमा कार्यरत थिइन्।
त्यस्तै, त्रिभुवन विश्वविद्यालय अन्तर्गत पद्मकन्या बहुमुखी क्याम्पसमा विगत सात वर्षदेखि पत्रकारिता अध्यापन गर्दै आएकी दाहाल सञ्चार सिप र नेतृत्व विकाससम्बन्धी प्रशिक्षक पनि हुन्।
उनले ‘कोभिड : नसोचेको, नभोगेको संकट’ नामक अनुसन्धानमूलक पुस्तकसमेत लेखेकी छिन् ।
