काठमाडौं । पूर्व–पश्चिम राजमार्गअन्तर्गत नवलपुरको गैंडाकोट नगरपालिका–९ स्थित हनुमान मन्दिर नजिक आज बिहान भयानक सवारी दुर्घटना भएको छ। दुर्घटनामा मानवीय क्षति भने नभए पनि १० भन्दा बढी व्यक्ति घाइते भएका छन्।
जिल्ला प्रहरी कार्यालय नवलपुरका सूचना अधिकारी डीएसपी अनिल पण्डितका अनुसार नेपालगञ्जबाट काठमाडौंतर्फ आउँदै गरेको लुम्बिनी प्रदेश ०१–००१ ख ०९१० नम्बरको बसले गैंडाकोटबाट भेंडाबारीतर्फ जाँदै गरेको बागमती प्रदेश ०१–०२८ च ५००४ नम्बरको हात्तीगाडी र सोही दिशाबाट अघि बढिरहेको बा ३ ख ३१६३ नम्बरको ट्रकलाई ठक्कर दिएको हो।
आज बिहान करिब ६:४५ बजे भएको उक्त दुर्घटनामा तीनवटै सवारी साधनका चालक घाइते भएका छन् भने बसमा सवार अन्य ८–९ जना यात्रु पनि सामान्य घाइते भएका छन्। घाइतेहरूलाई उपचारका लागि नजिकैको अस्पताल पठाइएको प्रहरीले जनाएको छ।
घाइते हुनेहरूमा ट्रक चालक रामेछापका ३२ वर्षीय इन्द्र तामाङ, बस चालक बाँकेको नेपालगञ्ज उपमहानगरपालिका–२० का ४१ वर्षीय मोहनसिंह बलामी मगर र हात्तीगाडी चालक चितवनको भरतपुर महानगरपालिका–१२ का ३३ वर्षीय दर्शन काप्री रहेका छन्। काप्रीको छातीमा चोट लागेको छ भने बस र ट्रक चालकका दुवै खुट्टामा चोट लागेको प्रहरीले जनाएको छ। तीनै जनाको अवस्था मध्यम रहेको बताइएको छ।
दुर्घटनापछि तीनवटै सवारी साधन सडक किनारमा राखिएको छ। यद्यपि, राजमार्गमा सवारी आवागमन भने अवरुद्ध नभएको प्रहरीले स्पष्ट पारेको छ। घटनाबारे थप अनुसन्धान जारी रहेको छ।
