काठमाडौँ । सर्वोच्च अदालतमा रवि लामिछाने माथि लागेको सहकारी ठगीसँगै दायर भएको संगठित अपराध र सम्पत्ति शुद्धीकरण मुद्दाको अभियोगपत्र फिर्ता लिने निर्णयविरुद्ध परेको रिटमा आज पनि सुनुवाइ हुँदैछ ।
न्यायाधीशद्वय सारङ्गा सुवेदी र सुनिलकुमार पोखरेलको संयुक्त इजलासमा आइतबारदेखि निरन्तर सुनुवाइ हुँदै आएको हो। आइतबार र सोमबार भएको बहस नसकिएपछि मुद्दा ‘हेर्दाहेर्दैमा’ राखिएको थियो।
गत पुस ३० गते सविता भण्डारी नेतृत्वको महान्यायाधिवक्ता कार्यालयले लामिछानेमाथि विभिन्न जिल्लामा विचाराधीन मुद्दामध्ये संगठित अपराध र सम्पत्ति शुद्धीकरणको अभियोग हटाउन जिल्ला सरकारी वकिल कार्यालयलाई निर्देशन दिएको थियो।
उक्त निर्णयविरुद्ध वरिष्ठ अधिवक्ता दिनेश त्रिपाठी, कानुनका विद्यार्थी आयुष बडाल र युवराज पौडेल सफलले सर्वोच्च अदालतमा छुट्टाछुट्टै रिट दायर गरेका थिए।
सर्वोच्च अदालतको आगामी निर्णयले महान्यायाधिवक्ता कार्यालयको निर्देशन कायम रहने वा बदर हुने भन्नेबारे टुंगो लाग्नेछ, जसले लामिछानेमाथिको मुद्दाको दिशा तय गर्नेछ।
