काठमाडौं। गत भदौ २३ र २४ गते भएको जेन-जी आन्दोलनका क्रममा सर्वोच्च अदालत,संसद् भवन, सिंहरबार र राष्ट्रपति भवन जलाउन पेट्रोलियम पदार्थको प्रयोग भएको पाइएको छ । भदौ २३ गते जेन-जीको आह्वान भएको आन्दोलनका क्रममा संसद भवनसहित राष्ट्रपति भवन जलाउन पेट्रोलियम पदार्थको प्रयोग फरेन्सिक परीक्षणमा पुष्टि भएको छ । आन्दोलनका क्रममा जलेका भवनबाट संकलन गरिएको १६ वटा नमुना भारतको गृह मन्त्रालय मातहत रहेको सेन्ट्रल फरेन्सिक साइन्स ल्याबोरेटरीमा परीक्षण गर्दा पेट्रोलियम पदार्थको अवशेष पाइएको हो । साइन्स ल्याबोरेटरीमा उक्त नमुनालाई भौतिक रसायन विधि, रसायन परीक्षण, थिन लेयर क्रोमाटोग्राफी, ग्यास क्रोमाटोग्राफी-मास स्पेक्ट्रोफोटोमेट्री विधिबाट परीक्षण गरेर पेट्रोलियम उत्पादन र तिनका अवशेष जाँच गरिएको थियो ।
