आईसीसीले सार्वजनिक गरेको पछिल्लो टी–२० अन्तर्राष्ट्रिय वरीयतामा नेपालका चार प्रमुख खेलाडीले उल्लेखनीय सुधार गरेका छन्। कप्तान रोहित पौडेल, उपकप्तान दीपेन्द्रसिंह ऐरी, ओपनर कुशल भुर्तेल र लेग स्पिनर सन्दीप लामिछानेको स्थान उक्लिएको हो।
अलराउन्डर दीपेन्द्रसिंह ऐरीले दुवै विभागमा प्रगति गरेका छन्। उनले ब्याटिङमा चार स्थान सुधार गर्दै ७२औँ स्थान र बलिङमा पाँच स्थान सुधार गर्दै ७१औँ स्थान हासिल गरेका छन्। यद्यपि, अलराउन्डरतर्फ भने उनी छैटौँ स्थानमै कायम छन्।
कप्तान रोहित पौडेल ब्याटिङ वरीयतामा तीन स्थान माथि उक्लिँदै ७५औँ स्थानमा पुगेका छन्। त्यस्तै, कुशल भुर्तेलले चार स्थान सुधार गर्दै ७७औँ स्थान कब्जा गरेका छन्। बलिङतर्फ सन्दीप लामिछानेले उत्कृष्ट प्रदर्शनको निरन्तरता दिँदै १० स्थान फड्को मारेर ७४औँ स्थानमा प्रवेश गरेका छन्।
विश्वकपअन्तर्गत नेपालले आज दोस्रो खेलमा इटालीसँग खेल्दैछ। पहिलो खेलमा इंग्ल्यान्डसँग झिनो चार रनले पराजित भएको नेपाल ऐतिहासिक पहिलो जित निकाल्ने लक्ष्यसहित मैदान उत्रने तयारीमा छ।
