काठमाडौं– जल तथा मौसम विज्ञान विभागको मौसम पूर्वानुमान महाशाखाका अनुसार हाल नेपालमा पश्चिमी वायुको आंशिक प्रभाव रहेको छ, जसका कारण देशको मौसममा परिवर्तन देखिएको छ।
महाशाखाका अनुसार हाल तराईका केही भूभागमा हुस्सु र कुहिरो लागेको छ भने पहाडी क्षेत्रमा आंशिक बदली देखिन थालेको छ। कोशी, बागमती र गण्डकी प्रदेशका पहाडी भूभागमा आंशिक बदली रहे पनि अन्य स्थानमा मौसम सामान्यतया सफा नै रहेको छ।
आज दिउँसोदेखि देशभरको मौसममा थप परिवर्तन आउने अनुमान गरिएको छ। सुदूरपश्चिम प्रदेशसहित देशका पहाडी तथा हिमाली भूभागमा साधारणतया बदली रहने सम्भावना छ।
यसैगरी, तराईका अधिकांश स्थानमा हुस्सु र कुहिरोको प्रभाव कायमै रहने भएकाले जनजीवन तथा सडक तथा हवाई यातायातमा सामान्य असर पर्न सक्ने महाशाखाले जनाएको छ।
महाशाखाका अनुसार कोशी, गण्डकी र कर्णाली प्रदेशका उच्च पहाडी तथा हिमाली क्षेत्रका एक–दुई स्थानमा हल्का वर्षा तथा हिमपातको सम्भावना रहेको छ।
