नेपालमा पहिलोपटक सालक सम्मेलन आयोजना हुने भएको छ। बागमती प्रदेश वन तथा वातावरण मन्त्रालयको आयोजनामा माघ २६ गते चितवनको माडीमा सालक सम्मेलन हुन लागेको हो।
डिभिजन वन कार्यालयको संयोजनमा आयोजना हुने सम्मेलनमा बागमती प्रदेशभित्रका डिभिजन वन कार्यालयका प्रमुखहरू, राष्ट्रिय निकुञ्ज तथा वन्यजन्तु संरक्षण विभाग, चितवन राष्ट्रिय निकुञ्ज, विभिन्न जिल्लाका सामुदायिक वनका प्रतिनिधि तथा संरक्षणकर्मीहरूको सहभागिता रहनेछ।
डिभिजन वन कार्यालय माडीका प्रमुख विष्णुप्रसाद आचार्यका अनुसार सम्मेलनमा संरक्षित वन्यजन्तु सालकको वर्तमान अवस्था, यसको संरक्षणको आवश्यकता, संरक्षणमा देखिएका चुनौती र आगामी कार्यदिशाका विषयमा विस्तृत छलफल गरिनेछ। सम्मेलनमा संरक्षण क्षेत्रमा क्रियाशील विभिन्न सङ्घसंस्थाका प्रतिनिधि, विज्ञसहित २०० भन्दा बढीको सहभागिता रहने उनले बताए।
सम्मेलनको अन्त्यमा सालक संरक्षणका लागि ‘माडी घोषणा पत्र’ जारी गरिनेछ। किसानको साथीका रूपमा परिचित सालकले कृषि क्षेत्रमा महत्वपूर्ण भूमिका खेल्ने भएकाले यसको संरक्षण अपरिहार्य रहेको आचार्यको भनाइ छ।
राष्ट्रिय निकुञ्ज ऐन २०२९ अनुसार सालक संरक्षित वन्यजन्तुमा सूचीकृत भए पनि हाल यो लोपोन्मुख अवस्थामा पुगेको छ। यसको संरक्षणका लागि सबै सरोकारवालाको सहकार्य आवश्यक रहेको उनले जोड दिए।
बागमती प्रदेश वन तथा वातावरण मन्त्रालयका सचिव केदार बरालले नेपालमा पहिलोपटक सालक सम्मेलन हुन लागेको जानकारी दिँदै वन्यजन्तु संरक्षण भनेपछि ठूला जनावरलाई मात्रै प्राथमिकता दिने प्रवृत्ति रहेको बताए। साना वन्यजन्तु पनि उत्तिकै महत्वपूर्ण भएकाले प्रदेश सरकारले सालक संरक्षणका लागि नीति तथा कार्यक्रम बनाएर काम अघि बढाएको उनले बताए।
उनका अनुसार आगामी वर्षदेखि सालक संरक्षणलाई नियमित कार्यक्रमका रूपमा सञ्चालन गरिनेछ। बागमती प्रदेशका सबै डिभिजन वन क्षेत्रमा सालक पाइने र यसको संरक्षणले सम्पूर्ण प्रकृतिलाई सकारात्मक प्रभाव पर्ने उनले बताए। भविष्यमा ‘सालक हेर्न बागमती प्रदेश जाऔँ’ भन्ने अवस्था सिर्जना गर्न यो सम्मेलन महत्वपूर्ण हुने उनको भनाइ छ।
सालक संरक्षणमा सामुदायिक वन र स्थानीय समुदायलाई एकीकृत गर्दै यसको बासस्थान र आहारा संरक्षणलाई अभियानका रूपमा अघि बढाइने मन्त्रालयले जनाएको छ। साथै सालक मार्ने वा क्षति पुर्याउनेलाई निकुञ्ज ऐनअनुसार कडा कारबाही गरिने चेतावनी पनि दिइएको छ।
