काठमाडौं । नेपाली चलचित्र उद्योगका एक चर्चित तर विवादास्पद व्यक्ति छवि ओझा बिहेकै कारण डेरामा सर्न बाध्य भएका छन् ।
२०४१ सालदेखि २०७३ सालसम्म चार पटक बिहे गरेका छवि करोडौंको घर छोडेर डेरामा सर्न बाध्य भएका हुन् ।
छविकी चार श्रीमतीमध्ये तीन जनाले उनीसँग डिभोर्स नै गरिसकेका छन् भने एक जनाले आत्महत्या गरेकी थिइन् ।
झन्डै डेढ दशकअघि अभिनेत्री रेखा थापासँगको वैवाहिक जीवन सम्बन्धविच्छेदमा टुंगाएका छविको अर्की नायिकासँगको डिभोर्सको मुद्दा किराना लागेको छ ।
निर्माता ओझा र नायिका शिल्पा पोखरेलबीचको सम्बन्ध विच्छेदको मुद्दा किनारा लागेको हो ।
जसअनुसार छविले शिल्पालाई चार करोड पर्ने काठमाडौंको गौरीघाटमा रहेको घर दिएका छन्, भने आफू भाडामा डेरा लिएर बसेका छन् ।
शिल्पा भने ४० लाख खर्चेर मर्मतसम्भार गरेपछि घरमा बस्दै आइरहेकी छन् ।
आफू श्रीमानबाटै असुरक्षित भन्दै शिल्पाले २०७६ साल असारमा प्रहरीमा उजुरी दिएकी थिइन् ।
सोही वर्ष नै उनले काठमाडौं जिल्ला अदालतमा सम्बन्ध विच्छेदको मुद्धा पनि दर्ता गरेकी थिइन् ।
२०७९ सालमा अदालतले शिल्पाको पक्षमा फैसला सुनाएको थियो ।
त्यसबेला अदालतले सम्बन्ध विच्छेद गरी शिल्पालाई आधा सम्पत्ति दिन आदेश दिएको थियो ।
अंशबन्डामा कुरा नमिल्दा लामो समयसम्म मुद्दा टुंगोमा पुग्न सकेको थिएन् ।
छविले आफू भन्दा ३० वर्ष कान्छी शिल्पासँग २०७३ सालमा विवाह गरेका थिए ।
तर, तीन वर्षपछि अर्थात् २०७६ असार ८ गते फिल्म हेर्न जाने निहुँमा उनीहरूबीच विवाद उत्पन्न भएपछि छविले शिल्पालाई कानको जालीमा प्वाल पर्ने गरी कुटपिट गरेका थिए ।
बिहे गरेको एक महिनादेखि नै आफूले हिंसा वेहोर्दै आएको र हिंसाको हद पार भएपछि शिल्पा डिभोर्सको निर्णयमा पुगेकी थिइन् ।
शिल्पा छविकी चौथो श्रीमती हुन् । छविले हेमासँग २०४१ सालमा बिहे गरेका थिए । हेमाका तर्फबाट उनका दुई सन्तान छन्, राजिव र महेश ।
बिहे गरेको ८ वर्षपछि उनीहरू अलग्गिए । त्यसपछि अभिनेत्रीहरूसँग उनको वैवाहिक यात्रा सुरु भएको हो ।
फिल्म ‘नाता’मा काम गर्ने क्रममा भेट भएकी गीताञ्जली सुनुवारसँग उनले दोस्रो बिहे गरेका थिए । डिप्रेसनका कारण गीताञ्जलीले आत्महत्या गरिन् । गीताञ्जलीका तर्फबाट एक छोरा छन् ।
गीताञ्जलीपछि छविले रेखासँग तेस्रो बिहे गरेका थिए । रेखालाई उनैले फिल्म ‘हिरो’बाट अभिनयमा अवसर दिएका थिए ।
छविसँग रेखाको सम्बन्ध १२ वर्षसम्म टिकेको थियो । अलग्गिएको चार वर्षपछि ०७३ साल असारमा रेखा र छविले औपचारिक रूपमा डिभोर्स गरेका थिए ।
