मान्छेको नाममा टुकुटुकु हिँड्ने
तर
आत्मा पनि नभएका
उद्देश्य पनि नबोकेका
हात खुट्टा, जिउडाल हेर्दा मान्छेजस्तै
तर, चाबीबाटै प्राय: चल्ने
स्वविवेक नभएका
कर्तव्यच्युत बुख्याँचाहरू ।
धेरैजसो बाँच्नको लागि खाने होइन
खानका लागि बाँचेकाहरू
अरूलाई दिन होइन
लिनका लागि जीवन साँचेकाहरू
अरूलाई खुसी बनाएर हाँस्ने होइन
पीडा दिएर रमाउनेहरू
लाजसरम पचाइसकेका
मृतात्मा बोकेका बुख्याँचाहरू ।
न त कुनै लक्ष्य छ
न त केही गर्ने चाहना नै
मपाईंत्वले भरिएका
आडम्बरले पुरिएका
लखरलखर हिँडिरहेछन्
समय खाली बिताइरहेका
तर पनि जीवितै रहेको ढोङ गर्ने
निर्जीव बुख्याँचाहरू ।
