मोरङको ग्रामथान गाउँपालिका–२ झोराहाटमा अवस्थित शारदा सेकेन्डरी स्कुलले सरस्वती पूजाको अवसर पारेर आफ्नो वार्षिकोत्सव मनाएको छ । वसन्त पञ्चमीको दिन शुक्रबार स्कुल परिसरमा विविध कार्यक्रमको आयोजना गर्दै स्कुलले १९औं वार्षिकोत्सव तथा अभिभावक दिवस मनाएको हो ।
विद्याकी देवी सरस्वतीको मूर्तिमा विधिवत पूजा गरी सुरु भएको वार्षिकोत्सव कार्यक्रममा सांगीतिक र साँस्कृतिक कार्यक्रमको आयोजना गरिएको थियो, जसमा विद्यार्थीहरूले नृत्य र गायन गर्दै उपस्थित अतिथि, अभिभावकलाई मनोरञ्जन प्रदान गरेका थिए ।
विराटनगरस्थित डिग्री कलेजका पूर्वक्याम्पस प्रमुख डा. मनोजकुमार राउतको प्रमुख आतिथ्यतामा भएको कार्यक्रममा शैक्षिक क्रियाकलापमा उत्कृष्ट विद्यार्थी र खेलकुदका विविध कार्यक्रमहरूका विजेता विद्यार्थीहरूलाई सम्मान गरिएको थियो ।
त्यसबाहेक सरस्वती पूजाको अवसर पारेर स्कुलले आयोजना गरेको अक्षराम्भ कार्यक्रममार्फत् ८० जना स–साना विद्यार्थीहरूलाई भर्ना गरिएको प्रिन्सिपल सञ्जयकुमार मण्डलले जानकारी दिए । कार्यक्रममा बोल्दै प्रिन्सिपल मण्डलले ग्रामथानभरिकै उत्कृष्ट शैक्षिक संस्थाका रूपमा कहलिएको स्कुलले प्रत्येक वर्ष सर्वोत्कृष्ट नतिजा आत्मसात् गरिरहेको बताए ।
कार्यक्रममा प्रमुख अतिथि डा. राउत, स्कुलका भाइस प्रिन्सिपल उमेश लुइँटेल, स्कुलका अध्यक्ष यादवप्रसाद खतिवडालगायतले मन्तव्य राखेका थिए । कार्यक्रममा वडाध्यक्ष यादव खतिवडा, कवि भरत गुरागाईं ‘बर्बरिक’, पूर्वसञ्चालक यदुननन्दन मिश्र, पूण्यप्रसाद लुइँटेल, शेखर नेपाल, तीर्थराम घिमिरे, गोपाल खतिवडा, ब्यानुधर लुइँटेल, शिक्षा शाखा प्रमुख विशिष्ठ अथिति भीम न्यौपाने तथा शिक्षक–शिक्षिका अनि अभिभावको उपस्थिति रहेको थियो ।
