विराटनगर । विराटनगर महानगरपालिका–८ मधुमारास्थित मुनलाइट गर्ल्स होस्टलकी सञ्चालक मधु रेग्मी पक्राउ परेकी छन् ।
रेग्मीलाई बुधबार दिउँसो पक्राउ गरिएको मोरङ प्रहरी प्रमुख प्रहरी नायब उपरीक्षक नवराज कार्कीले जानकारी दिए ।
मंगलबार साँझ विराटनगर नर्सिङ क्याम्पसमा बिएनएस र बीएससी नर्सिङमा अध्ययनरत तीन जना छात्रामाथि होस्टलको कोठाभित्र हातपात गरेको आरोपमा उनलाई पक्राउ गरिएको एसपी कार्कीले जनाए ।
पीडित छात्राले उजुरी दिएपछि पक्राउ गरिएको जनाउँदै एसपी कार्कीले पक्राउ परेकी रेग्मीलाई मोरङ प्रहरीले अभद्र व्यवहारको मुद्दामा म्याद थप गर्ने तयारी भएको सुनाए ।
होस्टलकी सञ्चालक रेग्मीले अग्रिम रूपमा भाडा माग्दै छात्रालाई दुर्व्यवहार गरेको भिडियो सामाजिक सञ्जालमा पोस्ट भएको थियो ।
आफू काठमाडौं जानुपर्ने जनाउँदै रेग्मी अग्रिम रूपमा भाडा माग्न मंगलबार साँझ ६ बजेतिर होस्टल पुगेकी थिइन् ।
रेग्मीले महिना नमरेको भए पनि अहिले तीन–तीन हजार रुपैयाँ दिएर सहयोग गर्न भनेकी थिइन् ।
तर, ती छात्राहरूले पनि आफूहरूसँग अहिले नभएको भनेपछि विवाद सुरु भएको थियो ।
विवाद बढ्दै जाँदा रेग्मीले छात्राहरूका किताब–कापी फ्याँकेकी थिइन् ।
सो होस्टलको उक्त रुममा तीन छात्रा बस्दै आएका थिए । उनीहरू विराटनगरस्थित नर्सिङ क्याम्पसको बिएनएस, बिएससी र नर्सिङ प्रथम वर्षमा अध्ययन गर्न आएका छात्रा हुन् ।
केही दिनयता मात्र उक्त होस्टलमा बस्न थालेका ती छात्राहरूले होस्टललाई दिनुपर्ने फागुन महिनाको सम्पूर्ण फी दिइसकिएको बताएका छन् ।
भोलिसम्ममा त्यो होस्टेल छोड्ने योजनामा रहेको भए पनि होस्टलकी सञ्चालिकाले चैत्रको पनि ती–तीन हजारका दरले ‘एड्भान्स’ दिनुपर्ने बताउँदै राति होस्टेल छोड्न धम्की दिएको छात्राहरूको आरोप छ ।
होस्टल सञ्चालकले डर देखाउँदै गाली–गलौच तथा हातपात गरेकी जनाउँदै ती छात्राहरूले सम्बन्धित निकायप्रति ध्यानाकर्षण गरेका छन् ।
यता, मोरङ प्रहरीले भने हालसम्म उक्त घटनालाई लिएर जाहेरी नपरेका कारण कारबाही प्रक्रिया अगाडि बढाउन नसकेको जनाएको छ ।
मोरङ प्रहरीका इन्स्पेक्टर दुर्गा राईले आफूहरूले घटनाबारे जानकारी लिएको भए पनि अहिलेसम्म पीडित पक्षले उजुरी नदिएकोले कारबाही प्रक्रिया थालनी नगरेको सुनाए ।
दुर्व्यवहारमा परेका विराटनगर नर्सिङ क्याम्पस पहिलो वर्षमा भर्ना भएका जुम्ला, पाल्पा र कन्चनपुर घर भएका विद्यार्थी हुन् ।
उक्त होस्टेलमा ३ फागुनदेखि बसिरहेका उनीहरुले ३ चैतसम्मका लागि अग्रिम आठ हजार रुपैयाँ बुझाएका थिए ।
कलेजकै होस्टेलमा बस्नेहरूको सूचीमा भर्खरै उनीहरूको पनि नाम निस्किएको थियो ।
उनीहरू बुधबारदेखि कलेजको होस्टेलमा बस्ने तयारी गरेका थिए । त्यसैले उनीहरू मुनलाइट गर्ल्स होस्टल छाडेर कलेजकै होस्टेलमा सर्ने तरखरमा थिए ।
