विराटनगर । विराटनगर महानगरपालिका–१ स्थित परोपकार घाटमा मध्यराति नांगै बसेर अश्लील हर्कत गरेको भिडियो सार्वजनिक भएको केही दिनपछि प्रहरीले घटनामा संलग्न ४ जनालाई पक्राउ गरेको छ ।
जिल्ला प्रहरी कार्यालय, मोरङले जारी गरेको प्रेस विज्ञप्तिअनुसार २०८३ साल असार ९ गते रातिको करिब १२ः३० बजे परोपकार घाटको दाहसंस्कार स्थलमा केही व्यक्ति भेला भई होहल्ला गरेको र उनीहरूमध्ये २ जना पुरुष निर्वस्त्र रहेको जानकारी प्रहरीले पाएपछि टोली खटाई अनुसन्धान थालेको थियो ।
अनुसन्धानका क्रममा प्रहरीले निम्न विराटनगर ६ का ४४ वर्षीय शुरेन्द्रमणि मन्डल, सुनसरीको रामधुनी नगरपालिका ६ का २५ वर्षीय कैलाश ढुङ्गाना, भोजपुरको रामप्रसाद राई गाउँपालिका ६ का १८ वर्षीय मनिष काफ्ले र विराटनगर ४ कै ४४ वर्षीय छबिलाल घिमिरे रहेका छन् ।
पक्राउ परेका व्यक्तिहरूलाई थप अनुसन्धानका लागि जिल्ला प्रहरी कार्यालय, मोरङमा राखिएको छ । प्रहरी सूचना अधिकारी डीएसपी मकेन्द्रकुमार मिश्रले घटनाको विस्तृत अनुसन्धान भइरहेको र वास्तविकता अनुसन्धान पूरा भएपछि सार्वजनिक हुने जानकारी दिएका छन् ।
यसअघि स्थानीयवासीले मध्यराति घाटमा देखिएको यो दृश्यलाई लिएर मसान खेलाएको वा अघोरी साधना गरेको हुनसक्ने अनुमान लगाएका थिए भने केहीले मदिराको लतमा परेका युवाहरूले अश्लील हर्कत गरेको आशंका व्यक्त गरेका थिए ।
स्थानीयले नै घटनाको भिडियो खिचेर सार्वजनिक गरेपछि यो विषय व्यापक चर्चामा आएको थियो । सोमबार मध्यराति खिचिएको भिडियोमा चार जनालाई घाटमा शव जलाउनलाई चिता बनाउने ठाउँमा आगो बालेर बसिरहेको देखिन्छ ।
त्यहाँ रहेकामध्ये २ जना युवा उभिएर एकअर्कालाई धकेलाधकेल गर्दै वादविवाद गरिरहेका थिए । तीमध्ये १ जना युवा पूरै नांगो अवस्थामा छन् भने अर्का युवाले कम्मरमुनिको भित्री वस्त्र मात्रै लगाएका छन् । उनीहरुले अश्लील शब्दहरु बोलेको पनि सुन्न सकिन्छ ।
घाटजस्ता सार्वजनिक तथा धार्मिक स्थलहरूको मर्यादा कायम राख्न आवश्यक सुरक्षा व्यवस्था थप कडा बनाउनुपर्ने स्थानीयको माग रहेको छ ।
