काठमाडौं । सीमा विवादसम्बन्धी प्रधानमन्त्री बालेन्द्र शाह (बालेन)को अभिव्यक्तिबारे स्पष्ट जवाफ माग्दै विपक्षी दलहरूले प्रतिनिधिसभामा विरोधलाई निरन्तरता दिने भएका छन्। बैठक सुरु भएलगत्तै समय लिएर आफ्ना धारणा राख्ने तयारी विपक्षीको छ।
नेपाली कांग्रेसकी प्रमुख सचेतक बासना थापाले प्रधानमन्त्रीले दिएको अभिव्यक्तिको तथ्य सार्वजनिक गर्नुपर्ने वा संसदीय रेकर्डबाट हटाउनुपर्ने अडान दोहोर्याएकी छन्। उनका अनुसार संसद् बैठक सुरु हुनेबित्तिकै विपक्षीले यही विषय उठाउनेछ।
प्रधानमन्त्री शाहले जेठ १७ गते प्रतिनिधिसभामा सांसदहरूको प्रश्नको जवाफ दिने क्रममा नेपालले पनि केही स्थानमा भारतको भूमि मिचेको जानकारी आफूले प्रधानमन्त्री बनेपछि मात्रै थाहा पाएको बताएका थिए। उक्त अभिव्यक्तिपछि विपक्षी दलहरूले त्यसको आधार र प्रमाण माग्दै लगातार संसद्मा विरोध गर्दै आएका छन्।
विपक्षीको माग छ– यदि प्रधानमन्त्रीसँग त्यसको तथ्य छ भने सार्वजनिक गरियोस्, अन्यथा माफी मागेर उक्त अभिव्यक्ति संसदीय रेकर्डबाट हटाइयोस्।
यस विषयमा संसद्मा विरोध सुरु भएको करिब ६० दिन पुगेको छ। यसबीच सभामुख डोलप्रसाद अर्यालले प्रधानमन्त्रीसँग भेट गरी समसामयिक विषयमा सदनमै आएर स्पष्ट धारणा राख्न सुझाव दिएका थिए। प्रधानमन्त्री शाहले भने त्यसबारे “विचार गर्ने” जवाफ दिएको सभामुखको सचिवालयले जनाएको छ।
