विराटनगर- मोरङको विराटनगर महानगरपालिका-१९ वैजनाथपुरस्थित खवास टोलमा रहेको पैनीमा पौडी खेल्ने क्रममा डुबेर एक बालकको मृत्यु भएको छ।
मोरङको ग्रामथान गाउँपालिका-२ निवासी अश्विन सरदारका अन्दाजी ८/९ वर्षीय छोरा प्रिन्स सरदार आइतबार बिहान करिब ११:२० बजे साथीहरूसँग पौडी खेल्ने क्रममा डुबेर बेपत्ता भएका थिए।
घटनाबारे दिउँसो १२:३० बजे प्रहरीलाई जानकारी प्राप्त भएपछि प्रहरी चौकी घिनाघाटबाट प्रहरी सहायक निरीक्षक रमेश भट्टराईको नेतृत्वमा चार सदस्यीय प्रहरी टोली तथा सशस्त्र प्रहरी बल नेपाल नं. ३ गण मोरङ, टंकीसिनवारीबाट सशस्त्र प्रहरी निरीक्षक वीरेन्द्र बोहराको नेतृत्वमा १३ सदस्यीय टोली घटनास्थलमा खटिएको थियो।
सुरक्षा निकायको संयुक्त खोजी अभियानपछि बालकलाई मृत अवस्थामा फेला पारिएको प्रहरीले जनाएको छ। आवश्यक कानूनी प्रक्रिया पूरा गरी दिउँसो करिब २:०० बजे शव पोस्टमार्टमका लागि कोशी अस्पताल पठाइएको थियो।
पोस्टमार्टम सम्पन्न भएपछि साँझ करिब ५:४० बजे मृतकका बुबा अश्विन सरदारलाई शव बुझाइएको प्रहरीले जनाएको छ।
घटनाबारे थप अनुसन्धान भइरहेको छ।
