काठमाडौं । राष्ट्रिय प्रजातन्त्र पार्टी (राप्रपा)ले सुनसरीको देवानगञ्ज गाउँपालिका–३ कप्तानगञ्जमा भएको हिंसात्मक घटनाप्रति गम्भीर ध्यानाकर्षण भएको जनाएको छ। पार्टीले घटनाका दोषीमाथि कडा कारबाही गर्न, पीडितलाई राहत उपलब्ध गराउन तथा दीर्घकालीन समाधानका लागि सर्वपक्षीय समिति गठन गर्न सरकारसँग माग गरेको छ।
राप्रपा अध्यक्ष राजेन्द्र लिङ्देनले मंगलबार विज्ञप्ति जारी गर्दै घटनामा ज्यान गुमाएका व्यक्तिका परिवारलाई उचित क्षतिपूर्ति उपलब्ध गराउन र घाइतेहरूको निःशुल्क उपचारको व्यवस्था गर्न सरकारसँग आग्रह गरेका छन्।
विज्ञप्तिमा तराई–मधेस क्षेत्रमा बढ्दो साम्प्रदायिक तनावप्रति चिन्ता व्यक्त गर्दै घटनाको निष्पक्ष छानबिनका लागि सर्वपक्षीय समिति गठन गरी तत्काल संवाद प्रक्रिया अघि बढाउन माग गरिएको छ।
राप्रपाले भविष्यमा यस्ता हिंसात्मक घटना दोहोरिन नदिने गरी प्रभावकारी र दीर्घकालीन समाधानको सुनिश्चितता गर्न पनि सरकारसँग आग्रह गरेको छ।
