विराटनगर । सुनसरीको बर्जु गाउँपालिका वडा नम्बर ३ मा फागुन २० गते आइतबारबाट दादुरा-रुबेला खोप अभियान सुरु हुने भएको छ ।
वडाध्यक्ष विनोदकुमार गुरुङका अनुसार आइतबारबाट नौ दिनसम्म वडाभरिका विभिन्न स्थानमा दादुरा-रुबेला खोप अभियान सञ्चालन हुने छ ।
वडाभित्रका विभिन्न विद्यालय र स्वास्थ्यचौकीमा फागुन ३० गतेसम्म यो अभियान चल्ने वडाध्यक्ष गुरुङले जानकारी दिए ।
दादुरा, रुबेला अति नै संक्रामक र प्राणघातक रोगहरू भएका कारण आफ्ना बालबालिकालाई खोप लगाएर यस्ता रोगबाट बचाउन गुरुङको आग्रह छ ।
‘दादुरा-रुबेलाको संक्रमणबाट बालबालिकाको मृत्युसमेत हुन सक्छ । दादुरा-रुबेला भएको एक जना व्यक्तिले १८ जना सम्मलाई यो सार्न सक्छ । त्यसैले आफ्ना बालबालिकालाई दादुरा-रुबेला खोप लगाएर यस्ता रोगहरू लाग्नबाट बचाऔं,’ वडाध्यक्ष गुरुङले भने ।
