कविता : ढुङ्गा हुँ म

ढुङ्गा हुँ म,
ढुङ्गामा खोजेर
फुलको सुभाष
कहाँ पाइन्छ ?
तितो तितो करेली म
खोजेर महको मिठास
कहाँ पाइन्छ ?
सियो हुँ भन्छन्
यहाँ तरबारहरु,
घाउ सिउने
दाबी झुठा गर्छन्
तर म त हुँ तरबार,
भुत्ते तरबार ,
काट्छु, नदुख्ने अभाष
खोजेर कहाँ पाइन्छ ?
तिमीले टेक्ने
धरातल मै हुँ,
हुँ म जमिन,
तिम्रो जरा म भित्रै छ
रित्त्तयाई प्रकृतिलाई
स्वार्थ भरेपछि
चिऽऽऽसो बतास
खोजेर कहाँ पाइन्छ ?
छैन हरियाली,
उराठ छन् वनपाखा
बुढा रुखमा रगत आयो
काटिएपछि हाँगा
मासेर जमिन
गगन चुम्ने घर रोपेपछि
सफा निलो आकाश
खोजेर कहाँ पाइन्छ ?
ढुङ्गा हुँ म,
ढुङ्गामा खोजेर
फुलको सुभाष
कहाँ पाइन्छ ?

-मिरमा