ट्राइ नेसन टी२०आई सिरिज अन्तर्गत आज नेपाल र मलेसिया आमनेसामने हुँदैछन् ।
घरेलु टोली नेपालले कीर्तिपुरस्थित टीयू अन्तर्राष्ट्रिय क्रिकेट रङ्गशालामा मलेसियाको सामना गर्दैछ ।
खेल दिउँसो १२ः३० बजे सुरू हुनेछ । नेपाल, पपुवा न्युगिनी (पिएनजी) र मलेसिया सम्मिलित ट्राइ नेसन टी२०आई सिरिज अन्तर्गतको यो तेस्रो खेल हो ।
यसअघि नेपाल र मलेसिया दुवैले आ-आफ्नो पहिलो खेलमा पिएनजीको सामना गरिसकेका छन् ।
सिरिजको पहिलो खेल पिएनजीविरुद्ध खेलेको नेपालले १५ रनको जित दर्ता गरेको थियो ।
यस्तै मार्च २९ (हिजो) सम्पन्न सिरिजको दोस्रो खेलमा मलेसियाले पिएनजीविरुद्ध आठ रनको रोमाञ्चक जित निकालेको थियो ।
बलियो मानिएको पिएनजीलाई हराएको मलेसिया सोही आत्मविश्वासलाई कायम राख्दै घरेलु भूमिममा नेपाललाई हराउन चाहन्छ ।
तर सुधारिएको ब्याटिङ गरिरहेको नेपाली टोली बलिङमा देखिएको समस्या हल गर्दै सिरिजमा आफ्नो कब्जा जमाउन चाहन्छ ।
डबल राउन्ड रोबिन लिगका आधारमा हुने सिरिजमा सहभागी तीनै टोलीले चार-चार खेल खेल्ने छन् । लिगको अन्त्यमा शीर्ष दुईमा पर्ने टोलीबीच फाइनलमा उपाधिका लागि भिड्न्त हुनेछ ।
आज मलेसियाविरुद्ध खेल्ने नेपालले भोलि (३१ मार्च) पिएनजीविरुद्ध खेल्नेछ । नेपालले सिरिजको अन्तिम खेल मलेसियाविरुद्ध २ अप्रिलमा खेल्दैछ ।
हेड-टु-हेड
नेपाल र मलेसियाबीचका पछिल्ला पाँच खेलका नतिजा हेर्ने हो भने नेपाल हाबी देखिन्छ ।
पछिल्ला पाँचमध्ये चार खेल आफ्नो पक्षमा पारेको नेपाल सोही प्रदर्शनलाई निरन्तरता दिन चाहन्छ ।
मलेसियाले पछिल्लो पटक नेपाललाई फेब्रुअरीमा भएको एसिसी इस्टर्न रिजन टी२० को दोस्रो खेलमा २२ रनको जित दर्ता गरेको थियो ।
त्यसयता नेपाल र मलेसिया दुई पटक आमनेसामने भएपनि मलेसिया विजयी हुन सकेको छैन । नेपालमा २०२१ अप्रिलमा आयोजित ट्राई नेसन सिरिजमा भएको दुवै भेटमा मलेसिया पराजित भएको थियो ।
