एसियाली मुलुक कतारमा आगामी नोभेम्बर महिनादेखि सुरु हुने फुटबलको महाकुम्भ विश्वकप फुटबलमा अहिलेसम्म २० वटा देशहरू छनोट भइसकेका छन् ।
सोमबार बिहान उत्तरी अमेरिकन राष्ट्र क्यानडा छनोट भएसँगै विश्वकप फुटबलमा छनोट हुने राष्ट्रको सङ्ख्या २० पुगेको हो ।
क्यानडा ३६ वर्षपछि विश्वकपमा छनोट भएको हो ।
आइतबार राति विश्वकप फुटबलको छनोटअन्तर्गत तेस्रो चरणको खेलमा जमैकालाई ४–० गोलले हराउँदै क्यानडाले कतार यात्रा सुनिश्चित गरेको हो ।
क्यानडाको टोरन्टोमा भएको खेलमा क्यानडालाई जिताउन केली लेरिन, टाजोन बुचानन र जुनियर होइलेटले एक–एक गोल गरे ।
क्यानडाले एउटा आत्मघाती गोल उपहारमा पाएको थियो । जमैकाका एड्रिएन मरिआप्पाले आफ्नै पोस्टमा गोल गरेका थिए ।
यसै समूहको अमेरिका भने विश्वकप छनोटको नजिक पुगेको छ । छनोट तेस्रो चरणको खेलमा पानामामाथि ५-१ गोलान्तरको सहज जित निकाल्दै अमेरिका विश्वकप छनोटनजिक पुगेको हो ।
सोमबार बिहान भएको खेलमा अमेरिकालाई जिताउन क्रिस्टियन पुलिसिकले ह्याट्रिक गोल गरे भने पल अरिओरा र जेसस फेरेइराले एक-एक गोल गरे ।
जितसँगै कोनकाफ क्षेत्रमा अमेरिकाले १३ खेलमा २५ अङ्क जोडेको छ । अमेरिका दोस्रो स्थानमा छ ।
यसपटकको विश्वकप २१ नोभेम्बरदेखि १८ डिसेम्बरसम्म चल्ने छ ।
विश्वकपको इतिहासमै पहिलोपटक विश्वकपका खेलहरू समरमा नभई विन्टरमा हुन लागेको हो ।
यस विश्वकपमा स्थान बनाउनका लागि विभिन्न राष्ट्रहरूले छनोट खेल खेलिरहेका छन् । त्यसमध्ये २० वटा राष्ट्रले भने कतार विश्वकपको यात्रा तय गरिसकेका छन् ।
युरोपियन च्याम्पियन इटाली भने लगातार विश्वकपमा छनोट हुन असफल भयो ।
बिहीबार राति भएको युरोपियन छनोटको प्ले अफ खेलमा नर्थ म्याकाडोनियासँग १–० गोलले हारेसँगै इटालीको कतार यात्रा असम्भव भएको हो ।
यसअघि शुक्रबार बिहानमात्र इक्वाडर र उरुग्वेले विश्वकपमा आफ्नो स्थान बनाएका थिए ।
त्यसअघि आयोजकको हिसाबले कतारका साथै जर्मनी, डेनमार्क, ब्राजिल, फ्रान्स, बेल्जियम, क्रोएसिया, स्पेन, सर्बिया, इङ्ग्ल्यान्ड, स्वीट्जरल्यान्ड, नेदरल्यान्ड्स, अर्जेन्टिना, इरान, दक्षिण कोरिया, जापान, साउदी अरेबिया विश्वकपमा छनोट भएका छन् ।
अब, केही राष्ट्र प्ले अफ खेलमार्फत छनोट हुने छन् ।
२९ मार्चमा युरोपका केही टिमले प्ले अफ खेल खेल्छेन् ।
ती खेलका विजेता टिमले विश्वकपमा स्थान बनाउँदा पराजित टिम बाहिरिने छ ।
अब, प्ले अफमा पोल्यान्ड र स्विडेनले खेल्ने छन् भने स्कटल्यान्डले युक्रेन र वेल्सको विजेता टिमसँग खेल्ने छ ।
इटालीलाई हराएको नर्थ म्याकाडोनियाले पोर्चुगलसँग विश्वकपमा स्थान बनाउनका लागि प्रतिस्पर्धा गर्ने छ ।
दक्षिण अमेरिकातर्फ पेरुले प्ले अफ खेलमार्फत विश्वकपमा स्थान बनाउने सम्भावना छ ।
यसैगरी, अस्ट्रेलिया र युएईले विश्वकपमा छनोट हुन प्ले अफ खेल खेल्ने छन् ।
