पोर्चुगल एसियाली राष्ट्र कतारमा नोभेम्बरदेखि सुरु हुने फिफा विश्वकप छनोट नजिक पुगेको छ ।
छनोटको प्ले अफ खेलमा टर्कीमाथि ३–१ गोल अन्तरको सहज जित निकाल्दै पोर्चुगल विश्वकपनजिक पुगेको हो ।
पोर्टोमा भएको प्ले अफको सेमिफाइनल खेलमा पोर्चुगललाई जिताउन अतभियो एड्मिल्सन डा सिल्भा मोन्टेइरो, डिएगो जोटा र माथेअस नुनेसले एक–एक गोल गरे ।
टर्कीका बुराक इल्माजले एक गोल गरे ।
खेलको १५औं मिनेटमा मोन्टेइरोको गोलबाट पोर्चुगलले सुरुवाती अग्रता लिएको थियो ।
४२औं मिनेटमा डिएगो जोटाले मोन्टेइरोकै पासमा गोल गर्दै पोर्चुगलको अग्रता दोब्बर पारे ।
६५औं मिनेटमा बुराक यिल्माजले सेन्गुइज अन्डरको पासमा गोल गर्दै खेललाई २–१ को स्थितिमा ल्याए ।
८५औं मिनेटमा बुराक पेनाल्टीमा चुक्दा टर्की बराबरीबाट चुक्यो ।
त्यसपछि इन्ज्युरी समयको थप गरिएको चौथो मिनेटमा म्याथिएस लुइजले राफयल लियोको पासमा गोल गर्दै जित पक्का गरे ।
टर्कीमाथि ३-१ गोलको सहज जित निकालेसँगै पोर्चुगल प्ले अफको फाइनलमा प्रवेश गरेको छ ।
अब पोर्चुगलले प्ले अफको फाइनलमा नर्थ म्यासेडोनियासँग प्रतिस्पर्धा गर्ने छ ।
नर्थ म्यासेडोनियाले बिहीबार राति नै युरो २०२० को च्याम्पियन इटालीलाई १–० ले स्तब्ध पार्दै फाइनलमा प्रवेश गरेको छ ।
पोर्चुगल र नर्थ म्यासेडोनियाबीचको खेल २९ मार्चमा हुनेछ ।
यस्तै, गएराति भएको अर्को खेलमा वेल्सले अस्ट्रियामाथि जित निकाल्यो ।
रोपियन छनोटको प्ले अफ खेलमा अस्ट्रियालाई २–१ गोलले हराउँदै वेल्सले कतार यात्राको सम्भावना जीवित राखेको हो ।
घरेलु मैदानमा वेल्सलाई जिताउन ग्यारेथ बेलले दुई गोल गरे भने अस्ट्रियाका मार्सल सबिट्जेरले एक गोल फर्काए ।
अब, उसले विश्वकप छनोटमा हुन स्कटल्यान्ड र युक्रेनबीचको विजेता टिमको सामना गर्ने छ ।
प्ले अफकै अर्को खेलमा स्विडेनले चेक रिपब्लिकलाई हराउँदै फाइनलमा स्थान बनायो ।
स्विडेनले चेक रिपब्लिकलाई १–० गोलले हराउँदै फाइनलमा स्थान बनाएको हो ।
स्विडेनले घरेलु मैदानमा अतिरिक्त समयमा चेक रिपब्लिकमाथि जित दर्ता गरेको हो ।
निर्धारित समय गोलरहित बराबरीमा सकिएपछि खेल अतिरिक्त समयमा धकेलिएको थियो ।
अतिरिक्त समयमा रोबिन क्वाइसनले गोल गर्दै स्विडेनलाई जिताए ।
अब, फाइनलमा उसले पोल्यान्डविरुद्ध खेल्ने छ ।
पोल्यान्ड भने रसियासँगको खेल रद्द भएसँगै फाइनलमा प्रवेश गरेको हो ।
यो खेलमा जित निकालेमा स्विडेन विश्वकपमा छनोट हुने छ ।
यो पनि :
युरोपियन च्याम्पियन इटाली लगातार दोस्रो पटक विश्वकपमा पुग्न असफल
