नेपाली फुटबल फ्रेन्चाइज लिग नेपाल सुपर लिग (एनएसएल) चैत २५ देखि नै आयोजना हुने निश्चित भएकाे छ ।
अखिल नेपाल फुटबल सङ्घ (एन्फा)ले आयोजना गर्न अनुमति दिएसँगै विवादीत बनेकाे एनएसएल ताेकिएकै मितिबाट आयोजना हुने भएकाे हाे ।
एन्फाले बुधबार एनएसएल आयोजक नेपाल स्पोर्ट्स एन्ड इभेन्ट म्यानेजमेन्ट प्रालिलाई प्रतियोगिता आयोजना गर्नका लागि चैत २५ देखि जेठ १ सम्मको लागि स्वीकृति प्रदान गरेको छ ।
‘ए’ डिभिजन क्लबहरुसँग छलफल गरी एन्फाले समाधान निकालेपछि लिग निर्धारित समयमै आयोजना हुने भएको हो ।
एन्फाले बुधबार एनएसएलको आयोजक नेपाल स्पोर्टस् एण्ड इभेन्ट मेनेजमेन्ट (एनएसइएम) प्रालिका प्रमुख कार्यकारी अधिकृत सुदीप शर्मालाई पत्र पठाउँदै आयोजनाको लागि अनुमति प्रदान गरेको जानकारी पनि गराएको छ ।
एनएसएलका कारण उत्पन्न विवाद समाधानका लागि एन्फाले अध्यक्ष कर्मा छिरिङ शेर्पाको संयोजकत्वमा सात सदस्यीय कार्यदल गठन गरेको थियो ।
एनएसएलका कारण फुटबलमा अन्यौलता बढेको भन्दै विरोधमा रहेका ‘ए’ डिभिजनका चार क्लबका प्रतिनिधि र एनएसएल आयोजकसँग बुधबार कार्यदलले छुट्टा छुट्टै छलफल गरेको थियो ।
एनएसएल र ए डिभिजन क्लबबीचकाे विवाद सतहमा नै देखिएपछि एन्फा विवाद समाधान गर्नतर्फ अग्रसर भएकाे थियाे ।
ए डिभिजन लिग सकिएलगत्तै खेलाडीहरु बिना जानकारी एनएसएल क्लमा अनुबन्धित भएकाे भन्दै ए डिभिजन क्लबहरुले आपत्ति जनाएका थिए ।
त्यसलगत्तै एन्फाले एनएसएललाई खेलाडीको अक्सन रोक्न पत्राचार गरेपनि आयोजकले अक्सन रोकेका थिएनन् । सम्पूर्ण तयारी भइसकेकाे भन्दै एनएसएलले
ताेकिएकै मिति र स्थानमा अक्सन सम्पन्न गर्याे ।
तर त्यसपछि भने एनएसएल आयाेजक केही लचिलाे देखिएका थिए । एनएसएल–ए डिभिजन क्लब विवाद उत्कर्षमा पुगेपछि एन्फाले एनएसएलको खेल तालिका ड्र गर्न रोक्न निर्देशन दिएकाे थियो ।
एन्फाकाे निर्देशन मान्दै ड्र राेकेकाे एनएसएसलले अन्ततः ताेकिएकै मितिमा प्रतियाेगिता आयाेजना गर्न अनुमति पाएकाे छ ।
अक्सनमा रहेका खेलाडी ‘ए’ डिभिजन क्लबमा अनुबन्ध रहेकोले खेलाडी रिलिज नभई एनएसएलमा अनुबन्ध नगराउन क्लबहरुले माग गर्दै आएका छन् ।
एन्फाले यसपटकको एनएसएल आयोजना पछि अहिलेको सम्झौता स्वत खारेज हुने पनि जनाएको छ ।
यसपटक एनएसएलमा विभिन्न शहरका १० वटा फ्रेन्चाइज टोलीले प्रतिस्पर्धा गर्दैछन् । सहभागी टोलीले मार्की खेलाडीसँगै अक्सनबाट एक सय ५० नेपाली खेलाडी टाेलिमा भित्र्याइसकेका छन् ।
याे पनिः https://shabdaexpress.com/2022/03/46213/
