नेपाल सुपर लिग (एनएसएल) को खेलाडी किनबेच (अक्सन) स्थगित भएको छ ।
एनएसएलको अक्सन शुक्रबार (भोलि) हुने तय भएको थियो ।
तर, केही समस्याका कारण सो अक्सन स्थगित भएको बताइएको छ ।
यसअघि अखिल नेपाल फुटबल सङ्घ (एन्फा) ले आयोजक नेपाल स्पोर्टस् एन्ड इभेन्ट म्यानेजमेन्टलाई एनएसएलको अक्सन रोक्न आग्रह गरेको थियो ।
एन्फाले बिहीबार आयोजकलाई पत्र पठाउँदै अक्सन रोक्न आग्रह गरेको हो ।
एन्फाका महासचिव इन्द्रमान तुलाधरले अक्सन रोक्न आग्रह गरिएको बताए ।
पछिल्लो समय खेलाडी अनुबन्धको विषयमा सहिद स्मारक ‘ए’ डिभिजन लिगका क्लबहरू आसन्न एनएसएलको विरोधमा उत्रिएका छन् ।
आफ्ना खेलाडी अनुबन्धनको विषयमा उनीहरूले विज्ञप्ति जारी गर्दै उनीहरूले विरोध जनाएका हुन् ।
‘ए’ डिभिजन लिगको समाप्तिपछि मोफसलमा पनि प्रतियोगिता बाँकी रहकाले क्लबको स्वीकृतिबिना अन्य प्रतियोगितामा क्लबमा करार नगर्न भन्दै उनीहरूले एनएसएलको विरोध गरेका हुन् ।
लिग च्याम्पियन मछिन्द्र फुटबल क्लबसहित आठ क्लबले बुधबार प्रेस विज्ञप्ति निकाल्दै क्लबको अनुमति बिना क्लबमा कानुनी रुपमा आबद्द खेलाडीको अक्सन गर्न लागेको भन्दै ध्यानाकर्षण भएको जनाएको थियो ।
विरोध जनाउने अन्य क्लबमा न्युरोट टिम एनआरटी, मनाङ मर्स्याङ्दी,सातदोबाटो युथ क्लब, थ्री स्टार क्लब, संकटा क्लब, जावलाखेल युथ क्लब र फ्रेन्ड्स क्लब रहेका छन् ।
महसचिव तुलाधरले एनएसएल र ए क्लबको विवाद देखिनुमा एन्फाको कमजोरी भएको समेत स्वीकार गरे ।
एनएसएलका लागि केही क्लबले आफ्ना मार्की खेलाडी अनुबन्धन गरिरहेका छन् ।
पहिलोपटक एनएसएलमा सहभागिता जनाउन लागेको झापाले आइतबारमात्र मनाङ मर्स्याङ्दी क्लबका कप्तान अन्जन विष्टलाई मार्की खेलाडीका रूपमा भित्र्याएको थियो ।
यस्तै, बिहीबार मात्र विराटनगर सिटी एफसीले मार्की खेलाडीमा रन्जित धिमाललाई निरन्तरता दिएको छ ।
रन्जित पहिलो सिजनमा समेत मार्की खेलाडी रहेका थिए ।
चैत २६ देखि जेठ ७ गतेसम्म सञ्चालन हुने फ्रेन्चाईज फुटबल लिग एनएसएल हुँदै छ ।
एन्फाको प्राविधिक सहयोगमा हुने एनएसएलमा यसपाली १० टोली सहभागी हुने तयारीमा छन् ।
गत संस्करणमा सात टोलीको मात्रै सहभागिता थियो ।
प्रतियोगिताका खेलहरू पोखरा र काठमाडौँमा खेलाइने पनि बताइएको छ ।
यो पनि:
