घरेलु राष्ट्र संयुक्त अरब इमिरेट्सविरुद्ध ब्याटिङ चल्न नसकेपछि नेपालले आइसिसी पुरुष विश्वकप लिग २ को युएईविरुद्धको खेलमा ४८ रनको लज्जास्पद हार वेहोरेको छ ।
युएईस्थित दुबई अन्तर्राष्ट्रिय क्रिकेट रङ्गशालामा आज सम्पन्न खेलमा नेपालले उत्कृष्ट बलिङ गरेपनि जवाफी ब्याटिङ गर्ने क्रममा खेलमा नियन्त्रण गुमाएको थियो ।
टस जित्दै पहिले ब्याटिङ रोजेको युएईलाई नेपालले ४६.३ ओभरमा एक सय ६८ रनमा रोकेको थियो ।
नेपालका लागि तीव्र गतिका बलर सोमपाल कामी र करण केसीले उत्कृष्ट प्रदर्शन गर्दै सात विकेट लिए । कामी एक्लैले चार विकेट लिँदा केसीले तीन विकेट हात पारे ।
केसी र कामीबाहेक कप्तान सन्दिप लामिछाने, दिपेन्द्र सिंह ऐरी र सागर ढकालले समान एक-एक विकेट लिए ।
१० अतिरिक्त रन पाएको युएईका लागि ६ ब्याटरले मात्र दोहोरो अङ्कको रन जोडे ।
२७ रनमा दुई विकेट गुमाएको युएईका लागि चुन्दाङपोयिल रिजवान र रोहन मुस्ताफाले समान ४० रनको योगदान दिए ।
मोहम्मद वासिमले २१, काशिफ दाउदले १८ र वसिल हमिदले १४ रन जोड्नुबाहेक अन्य चार व्याटरले युएईका लागि १२ रन मात्रै जोडे ।
निकै बलियो मानिएको युएईलाई सस्तैमा समेटेको नेपालले सुरुवात भने गतिलो गर्न सकेन ।
१९ रन जोड्दा आफ्ना दुई ओपनर पेभिलियनमा पाएको नेपालले त्यसपछि पनि क्रिजमा सशक्त प्रदर्शन गर्न सकेन ।
चौथो ओभरमा नै नेपालका ओपनर कुशल भुर्तेल पेभिलियन फर्किए । १५ बलको सामना गरेका भुर्तेल एक चौकाको मद्दतमा ११ रन जोड्दै सिद्दिकीको बलमा बोल्ड आउट भए ।
भुर्तेल आउट भएको तेस्रो बलमा नै नेपाललाई अर्को झट्का लाग्यो ।
नेपालका अर्का ओपनर आशिफ शेख क्याच आउट भए । १२ बलको सामना गरेका शेखलाई सात रनमा सिद्दिकीले नै सुरीमार्फत सजिलो क्याच गराए ।
एकै ओभरमा दुई ओपनरलाई गुमाएपछि दबाबमा देखिएको नेपालको इनिङलाई ज्ञानेन्द्र मल्ल र दिपेन्द्रसिंह ऐरीले सम्हाल्ने प्रयास गरे पनि सफल हुन सकेनन् ।
नवौं ओभरको पाँचौँ बलमा ऐरी रन आउट भएपछि नेपालमाथि दबाब झनै थपिएको थियो । सिद्दिकीको बलमा ऐरी युएईका विकेटकिपर अरविन्दबाट रन आउट भए ।
त्यसपछि क्रिजमा आएका रोहित पौडेलले ४६ र ज्ञानेन्द्र मल्लले २८ रन जोड्दै नेपालको समस्या हल गर्न खोजे पनि युएईका बलर बाधक बने ।
मल्ललाई रोहन मुस्ताफाले एलबीडब्ल्यू धरापमा पारे । २२औं ओभरको अन्तिम बलमा मल्ललाई गुमाएको नेपालले आरिफ शेखलाई शुन्य रनमा नै गुमायो ।
शेखलाई गुमाउँदा नेपाल पाँच विकेट गुमाएर २३औं ओभरमा ८५ रन बनाएर खेलिरहेको थियो ।
त्यसपछि क्रिजमा सेट भएका ब्याटर रोहित पौडेललाई २९औं ओभरमा गुमाएपछि भने नेपालमाथि युएई पूणर् रुपमा हाबी भयो ।
तल्लो क्रममा हार्ड हिटिङ ब्याटरको परिचय बनाएका करण केसी र सोमपाल कामीले बेन्चबाट क्रिजमा आएर १२ रन मात्रै बनाएपछि नेपालको हार निश्चित भयो ।
त्यसपछि आएका ब्याटरमध्ये कप्तान सन्दिप लामिछानेले सात रन बनाउनुबाहेक अन्य ब्याटरले रन जोड्न सकेनन् ।
नेपालका लागि सर्वाधिक रोहित पौडेलले ४६ रन बनाए । ज्ञानेन्द्र मल्लले २८ र कुशल भुर्तेलले ११ रनको योगदान दिनुबाहेक युएईविरुद्ध अन्य ब्याटरको प्रदर्शन बिर्सनलायक रह्यो ।
पाँच अतिरिक्त रन जोडेको नेपालका लागि दुई ब्याटर शुन्य रनमा पेभिलियन फर्किए । त्यसबाहेकका पाँच ब्याटरले मात्र ३० रनले जोडे ।
युएईका बसिल हमिदले सर्वाधिक चार विकेट लिए । जुनैद सिद्दिकीले तीन विकेट हात पार्दा रोहन मुस्ताफा र जाहुर खानले समान एक-एक विकेट लिए ।
१०औं ओभरमा तीन विकेट गुमाएको नेपालले ८२ रन हुँदा चौथो विकेट गुमायो । २२औं ओभरमा ८२ रन हुँदा चौथो विकेट गुमाएको नेपालले ३८ रन जोड्दा ६ विकेट गुमायो ।
सामान्य लक्ष्य पाउँदा पनि युएईविरुद्ध कमजोर ब्याटिङ गर्दै लज्जास्पद हार बेहारेपछि नेपाली खेलाडीको तीव्र आलोचना हुन थालेको छ ।
अघिल्लो खेलमा पपुवा न्युगिनीविरुद्ध पनि कमजोर ब्याटिङ गरेको नेपालले गत महिना सम्पन्न टी२० विश्वकप ग्लोबल क्वालिफायरमा पनि कमजोर ब्याटिङ गर्दै विश्वकप २०२२ खेल्ने सुनौलो अवसर गुमाएको थियो ।
बलिङमा निकै शक्तिशाली रहेको नेपालको ब्याटिङ अझै सुधार हुन सकिरहेको छैन ।
ब्याटिङको समस्या सुधार नभएकाले नेपाली क्रिकेट समर्थकहरुले नेपाली ब्याटरले ब्याटिङ नै बिर्सिएको भन्दैे ट्रोल गर्न थालेका छन् ।
लिगमा १६ खेल खेलेको युएई २० अङ्कका साथ दोस्रो स्थानमा छ । यता सबैभन्दा कम दश खेल खेलेको नेपाल युएईसँगको हारसँगै १० अङ्कसहित छैटौं स्थानमा यथावत् छ ।
नेपाल, युएई र पपुवा न्युगिनी सम्मिलित त्रिकोणात्मक सिरिजअन्तर्गत पहिलो खेलमा युएई र पपुवा न्युगिनी (पिएनजी) आमनेसामने भएका थिए ।
१५ मार्चमा भएको सिरिजको पहिलो खेलमा पिएजनी युएईसँग सात विकेटले पराजित भएको थियो ।
लगत्तै नेपालसँग भिडेको पिएनजी दोस्रो खेलमा पनि दुई विकेटले पराजित भएको थियो । १४ खेल खेलिसकेको पिएनजी अङ्कविहीन रहँदै अङ्कतालिकाको पुछारमा छ ।
नेपालले आफ्नो तेस्रो खेल युएईसँग २१ मार्चमा र सिरिजको अन्तिम तथा चौथो खेलमा पिएजनीको २२ मार्चमा सामना गर्नेछ ।
तस्बिरमा हेर्नुहाेस् नेपाल भर्सेज युएई
