घरेलु टोली संयुक्त अरब इमिरेट्स (युएई) ले नेपाली क्रिकेट टोलीलाई जितका लागि सामान्य रनको लक्ष्य दिएको छ ।
दुबईमा जारी आइसिसी पुरुष क्रिकेट विश्वकप लिग २ को पाथवेज अन्तर्गत तीन राष्ट्र सम्मिलित सिरिज खेलिरहेका नेपाल र युएईमध्ये युएईले टस जितेर पहिले ब्याटिङ गर्ने निधो गरेको थियो ।
तर नेपाली बलर युएईका ब्याटरविरुद्ध हावी भएसँगै युएईले जितका लागि नेपाललाई एक सय ६९ रनको सामान्य लक्ष्य दिएको छ ।
४६.३ ओभर मात्रै खेलेको युएईले सबै विकेट गुमाएर एक सय ६८ रन मात्रै बनाउन सफल भयो ।
युएईका लागि रोहन मुस्तफा र चुन्दनगापोइल रिजनले समान ४० रन बनाउनबाहेक अन्य ब्याटरको प्रदर्शन सन्तोषजनक रहेन ।
ओपनर मोहम्मद वसिमले २१, काशिफ दाउदले १८ र कप्तान अहमेद राजाले १३ रन बनाउनबाहेक युएईका अन्य ब्याटरले दोहोरो अङ्कको रन बनाउन नै सकेनन् ।
नेपालका लागि सर्वाधिक रन तीव्र गतिका बलर सोमपाल कामीले लिए ।
नौ ओभर बलिङ गरेका उनले मात्र ३९ रन खर्चेर सर्वाधिक चार विकेट लिए ।
कामीबाहेक करण केसीले तीन विकेट लिए । कप्तान सन्दिप लामिछाने, दिपेन्द्रसिंह ऐरी र सागर
ढकालले समान एक-एक विकेट लिएसँगै युएई सस्तैमा समेटियो ।
लिगमा १५ खेल खेलिसकेको युएई १८ अङ्कका साथ दोस्रो स्थानमा छ । यता सबैभन्दा कम नौ खेल खेलेको नेपाल १० अङ्कसहित छैटौं स्थानमा छ ।
नेपाल र युएईबाहेक सिरिजमा रहेको पपुवा न्युगिनी (पिएनजी) भने अङ्कतालिकाको पुछारमा छ ।
१४ खेल खेलिसकेको पिएनजी हालसम्म अङ्कविहीन रहेको एक मात्र टोली हो ।
