आउँदो नयाँ वर्ष २०७९ बाट नेपालमा मोबाइल डिभाइस म्यानेजमेन्ट सिस्टम (एमडीएमएस) पूर्ण सञ्चालनमा आउने भएको छ ।
अवैध रुपमा नेपाल भित्रिएका मोबाइल नियन्त्रण लागि स्थापना गरिएको एमडीएमएस यहीँ वर्षको साउनबाट लागू गर्ने सरकारले निर्णय गरेको थियो ।
तर आवश्यक उपकरणको व्यवस्था नहुँदा एमडीएमएस लागू गर्न नसकिएको बताउँदै नेपाल दूरसञ्चार प्राधिकरणले २०७९ वैशाखबाट भने एमडीएमएस पूर्ण रुपमा लागू गर्ने बताएको छ ।
शुक्रबार (हिजो) आयोजित नेपाल दूरसञ्चार प्राधिकरणको २४औँ वार्षिकोत्वस कार्यक्रममा बोल्दै प्राधिकरणका अध्यक्ष पुरुषोत्तम खनालले एमडीएमएस लागू गर्न आवश्यक सम्पूर्ण सामग्री आइसकेकाले वैशाखबाट कार्यान्वयन गर्ने बताएका छन् ।
‘‘एमडीएमएसका लागि आवश्यक ‘इम्पोर्टर मोडल’ सञ्चालनमा आइसकेको छ । सँगै ‘कस्टमर मोडल’ पनि सञ्चालनको तयारीमा छौँ’’ अध्यक्ष खनालले भने, ‘‘सबै काम पूरा हुन लागेको छ । आउँदो वैशाखबाट लागू गर्छौँ ।’’
एमडीएमएस प्रणाली यस्तो प्रविधि हो जसले मोबाइल हराएमा वा चोरी भएमा सहजै पत्ता लगाउन सक्छ । साथै, अवैध रुपमा नेपाल भित्रिएका मोबाइललाई निस्तेज गर्न सक्छ ।
नेपालमा अवैध रुपमा मोबाइल भित्रिने गरेको जसले ठूलो मात्रामा राजस्व गुमेको ठहर गर्दै चालू आर्थिक वर्षबाट नै एमडीएमएस लागू गर्ने निर्णय गरेको थियो ।
तर विविध कारण एमडीएमएसलाई सरकारले कार्यान्वयन गर्न सकिरहेको छैन ।
