काठमाडौं । त्रिभुवन विश्वविद्यालय (त्रिवि)ले लामो समयदेखि अनियमित रहेको शैक्षिक पात्रो सुधार्ने लक्ष्यसहित धमाधम परीक्षा सञ्चालन गरिरहेको छ।
त्रिवि परीक्षा नियन्त्रण कार्यालयका अनुसार आगामी साउनदेखि नियमित शैक्षिक पात्रोअनुसार परीक्षा सञ्चालन गर्ने तयारीस्वरूप अहिले अनियमित भएका सबै परीक्षा तीव्र गतिमा लिइँदै छन्। परीक्षा नियन्त्रक लक्ष्मण पौडेलले महिनामा तीनदेखि चार प्रकारका परीक्षा सञ्चालन भइरहेको जानकारी दिए।
“अनियमित भएको पात्रोलाई सुधार्न अहिले हामी महिनामा तीनदेखि चारवटा परीक्षा सञ्चालन गरिरहेका छौं,” उनले भने, “२०५३ सालदेखिका मौका परीक्षा समेत असारसम्म सम्पन्न गर्ने लक्ष्य राखिएको छ।”
हाल वैशाख महिनामै चार प्रकारका परीक्षा सञ्चालन भइरहेका छन्। स्नातक तहअन्तर्गत बीएएलएलबी दोस्रो वर्ष, नियमित दोस्रो वर्ष, बीटेक पहिलो र दोस्रो वर्षका परीक्षा चलिरहेका छन्।
पौडेलका अनुसार असारसम्म सबै बाँकी परीक्षा सम्पन्न गरी आगामी साउनदेखि २०८३ सालको शैक्षिक पात्रोअनुसार नियमित परीक्षा सञ्चालन गरिनेछ। जेठ महिनाका लागि तीनवर्षे स्नातक तहको पहिलो वर्ष, चारवर्षे स्नातक पहिलो वर्ष, बीएएलएलबी तेस्रो वर्ष तथा बीटेक तेस्रो वर्षका परीक्षाको कार्यतालिका सार्वजनिक भइसकेको छ।
त्यस्तै असार महिनामा स्नातक तहका सबै संकायको चौथो वर्षको नियमित परीक्षा सञ्चालन गरिने तयारी गरिएको छ।
उनका अनुसार कोरोना भाइरस महामारी र त्यसपछिका विभिन्न आन्दोलनका कारण अवरुद्ध भएका परीक्षा अब पूर्ण रूपमा नियमित गरिनेछ। हाल सञ्चालन भइरहेका परीक्षामा करिब एक लाख १५ हजार परीक्षार्थी सहभागी रहेका छन्।
यसैबीच, परीक्षा नियन्त्रण कार्यालयले परीक्षा सम्पन्न भएको १०० दिनभित्रै नतिजा प्रकाशन गर्ने व्यवस्था लागू गरेको जनाएको छ।
