स्पेनिस फुटबल लिग ला लिगाको शीर्ष चारभित्र पर्न एट्लेटिको मड्रिड र बार्सिलोना आज भिड्दैछन् ।
बार्सिलोनाको घरेलु मैदान क्याम्पनोउमा हुन लागेको खेल नेपाली समय अनुसार राती ९ बजे सुरू हुँदैछ ।
ला लिगा अङ्क तालिकाको अघिपछि रहेका यी दुवै क्लबमध्ये आज खेलमा विजयी हुने क्लबले ला लिगाको चौथो स्थानमा आफूलाई सुरक्षित गर्नेछ ।
२१ खेल खेलेको एट्लेटिको ३६ अङ्कका साथ तालिकाको चौथो स्थानमा रहँदा समान खेलबाट ३५ अङ्क बटुलेको बार्सिलोना भने पाँचौ स्थानमा छ ।
यसअघिको लिगको पहिलो भेटमा बार्सिलोना एट्लेटिकोसँग २–० ले पराजित भएको थियो । वान्डा मेट्रोपोलिटानोमा भएको उक्त खेलमा एट्लेटिको जिताउन बार्सिलोनाका पूर्व खेलाडी लुइस स्वारेज र लेमारले गोल गरेका थिए ।
आजको खेलमा विजयी हुँदै बार्सिलोनालाई अघिल्लो भेटको बदला लिने मौका छ । सँगै एट्लेटिकोलाई पछि पार्दै अङ्क तालिकामा अघि बढ्ने सुवर्ण अवसर छ ।
सिजनको सुरुवातमा लोभलाग्दो प्रदर्शन गरे पनि पछिल्लो समय खराब फर्मबाट गुज्रिरहेको एट्लेटिको बार्सिलोनालाई हराउँदै लिगमा आफूलाई साबित गर्न चाहन्छ ।
तर नयाँ खेलाडी र प्रशिक्षकको साथ पाएको बार्सिलोना डिएगो सिमिओनेलाई रोक्न तयार देखिएको छ ।
सिजनको सुरुवात खराब फर्मबाट सुरू गरेको बार्सिलोनामा पूर्व खेलाडी जाभी हर्नान्डेजको आगमन भएसँगै केही सुधार देखिएको छ ।
तर ढलपलिदै अघि बढिरहेको बार्सिलोनाले आजको खेलमा कस्तो नतिजा आत्मसाथ गर्ने हो ? त्यसको लागि आजको खेलको अन्तिम समयसम्म पर्खनुको विकल्प छैन ।
२२ खेलबाट ५० अङ्क बटुलेको रियल मड्रिड तालिकाको शीर्ष स्थानमा छ ।
रियलभन्दा एक खेल बढि खेलेको सेभिल्ला ४७ अङ्कका साथ दोस्रो स्थानमा रहँदा २२ खेल खेलेको रियल बेटिस ४० अङ्कका साथ ला लिगाको तेस्रो स्थानमा छ ।
