एट्लेटिको मड्रिडलाई ७–० गोलान्तरले पाखा लगाउँदै बार्सिलोनाको महिला टोलीले स्पेनिस सुपर कपको उपाधि उचालेको छ ।
लास रोजास (स्पेन) मा आज भएको फाइनल खेलमा एट्लेटिकोलाई पराजित गर्न क्यारोलिन ग्राहम हानसेनले ह्याट्रिक गरिन् ।
त्यस्तै, लाइके मार्टेन्सले दुई र इन्ग्रिड सिस्र्टाड एन्जेन र फ्रिडोलिना रोल्फोको नाममा समान एक–एक गोल रह्यो ।
सेमिफाइनलमा रियल मड्रिडविरुद्ध १–० गोलान्तरको साँघुरो जित दर्ता गराउँदै बार्सिलोना फाइनल पुग्दा उसको आजको प्रतिद्वन्द्वी एट्लेटिकोले भने लेभान्टेविरुद्ध ३–२ को रोमाञ्चक जित निकालेको थियो ।
यस संस्करणको उपाधि जितेसँगै बार्सिलोनाले समग्रमा दोस्रो पटक स्पेनिस सुपर कपको उपाधि जितेको छ । सन् २००० बाट बन्द गरिएको सो प्रतियोगिता रोयल स्पेनिस फुटबल फेडेरेसनले २०१९ को सिजनबाट पुनः सञ्चालनमा ल्याएको थियो ।
स्पेनका चार महिला फुटबल टोली समावेश स्पेनिस सुपर कपको ०१९/२० को उपाधि बार्सिलोनाले जित्दा २०/२१ को सिजन भने एट्लेटिको मड्रिडले जितेको थियो ।
