पूर्वी अफ्रिकन मुलुक मोरिससको फुटबल टोली स्वदेश फर्किएको छ ।
माघ १५ र १८ गते नेपालसँग दुई मैत्रीपूर्ण फुटबल खेल खेलेर आएको मोरिससको टिम बिहीबार साँझ स्वदेश फर्किएको हो ।
मोरिसस फुटबल महासङ्घले करिब दुई साताको नेपाल बसाइपछि टोली आज स्वदेश फर्किएको जनाएको छ ।
महासङ्घका अनुसार टोली काठमाडौँबाट टर्कीका लागि प्रस्थान गरेको ।
त्यहाँबाट शनिबार बिहान टोली मोरिससका लागि हिँड्ने छ ।
शनिबार दिउँसोतिर टोली स्वदेश पुग्ने अनुमान गरिएको छ ।
मोरिसस नेपालसँग दुईवटा मैत्रीपूर्ण फुटबल खेल्न १० माघमा काठमाडौँ आइपुगेको थियो ।
मोरिससले नेपालसँगका दुवै खेल त्रिपुरेश्वरस्थित दशरथ रङ्गशालामा खेलेको थियो ।
मोरिससको यो दोस्रो दक्षिण एसियाको भ्रमण हो ।
यसअघि उसले सन् २०१७ मा भारतको भ्रमण गरेको थियो ।
भारतको मुम्बईमा भएको सो मैत्रीपूर्ण खेलमा पनि उसले जित निकाल्न सकेन । मोरिसस सो खेलमा २-१ गोलले पराजित भएको थियो ।
दोस्रो पटक मैत्रीपूर्ण खेलकै लागि नेपालको भ्रमण गरेकाे मोरिसस यस पटक पनि अभागी ठहरियो ।
उसले दुवै मैत्रीपूर्ण खेलमा १-० गोलान्तरकाे हार बेहोरेको थियो ।
शनिबार पहिलो मैत्रीपूर्ण खेलमा मोरिसस नेपालसँग १-० गोलले पराजित हुन पुग्यो ।
नेपालकाे जितका लागि फरवार्ड विमल घर्तीमगरकाे गोल निर्णायक साबित भएको थियो ।
मङ्गलबार दोस्रो मैत्रीपूर्ण खेलमा नेपालका सुजल श्रेष्ठले गरेको एकमात्र गोलले मोरिसस पराजित बन्यो ।
समग्रमा हेर्दा दक्षिण एसियाली राष्ट्रमा गरेका दुवै भ्रमणमा मोरिसस अभागी सावित भएको छ ।
कारण, दुवैमा ऊ पराजित भएको छ ।
