पूर्वी अफ्रिकन मुलुक मोरिससले माघ १५ र १८ गते नेपालसँग दुई मैत्रीपूर्ण फुटबल खेल खेल्यो ।
नेपालसँग दुईवटा मैत्रीपूर्ण फुटबल खेल्न १० माघमा काठमाडौँ आइपुगेको मोरिससले नेपालसँगका दुवै खेल त्रिपुरेश्वरस्थित दशरथ रङ्गशालामा खेलेको थियो ।
मोरिससको यो दोस्रो दक्षिण एसियाको भ्रमण हो । यसअघि उसले सन् २०१७ मा भारतको भ्रमण गरेको थियो ।
भारतको मुम्बईमा भएको सो मैत्रीपूर्ण खेलमा पनि उसले जित निकाल्न सकेन । मोरिसस सो खेलमा २-१ गोलले पराजित भएको थियो ।
दोस्रो पटक मैत्रीपूर्ण खेलकै लागि नेपालको भ्रमण गरेकाे मोरिसस यस पटक पनि अभागी ठहरियो ।
उसले दुवै मैत्रीपूर्ण खेलमा १-० गोलान्तरकाे हार बेहोरेको थियो ।
शनिबार पहिलो मैत्रीपूर्ण खेलमा मोरिसस नेपालसँग १-० गोलले पराजित हुन पुग्यो ।
नेपालकाे जितका लागि फरवार्ड विमल घर्तीमगरकाे गोल निर्णायक साबित भएको थियो ।
मङ्गलबार दोस्रो मैत्रीपूर्ण खेलमा नेपालका सुजल श्रेष्ठले गरेको एकमात्र गोलले मोरिसस पराजित बन्यो ।
पहिलोको तुलनामा दोस्रो खेल रोमाञ्चक र तनावपूर्ण बन्यो ।
नेपालको सुरुवाती गोल र मोरिससले लगत्तै पेनाल्टी मिस गरेपछि खेल अन्तिमसम्म तनावपूर्ण रह्यो ।
खेल मैत्रीपूर्ण भएपनि खेलाडी र अफिसियलले मैदानमा अमैत्री व्यहार देखाए । जसकारण ८०औँ मिनेटमा दुवैतर्फका खेलाडी एक आपसमा हात हालाहालको अवस्थामा पुगे ।
कार्डको वर्षा भएको खेलमा मोरिससले नौ र नेपालले १० खेलाडीमा खेल सकाए ।
रेफ्री नविन्द्र महर्जनलाई खेल नियन्त्रण गर्न हम्मेहम्मे परेको थियो । खेल नियन्त्रणमा लिन उनले १५ वटा कार्ड प्रयोग गरेका थिए ।
खेलाडी टसलमा उत्रिएपछि मोरिससका एडरिन बोटबर र इमानुल फुलचन्ड तथा नेपालका पुजन उपरकोटीले दोहोरो पहेँलो (रातो) कार्ड पाए ।
यस्तै, नेपालका गाेलकिपर प्रशिक्षक विकास मल्ललाई समते राताे कार्ड देखाइएकाे थियाे ।
पाेस्ट म्याच कन्फ्रेन्समा बाेल्दै मोरिससका प्रशिक्षक टोनी फ्रान्कोइसले नेपालबाट केही फरक अनुभवसहित टोली फर्कन लागेकोमा खुशी व्यक्त गरेका छन् ।
‘लामाे समयपछि खेलमा फर्किएका र थपिएका नयाँ खेलाडी आवेशमा आए’ प्रशिक्षक फ्रान्काेइसले भने, ‘अघिल्लाे खेल हारेकाले दाेस्राे खेलमा जित निकाल्ने प्रयास गर्दा केही खेलाडीले नियन्त्रण गुमाए तर पनि म टाेलीकाे समग्र प्रर्दशनबाट सन्तुष्ट छु ।’
समग्रमा हेर्दा दक्षिण एसियाली राष्ट्रमा गरेका दुवै भ्रमणमा मोरिसस अभागी सावित भएको छ । कारण, दुवैमा ऊ पराजित भएको छ ।
अब, मोरिससका खेलाडी र अफिसियलको टिम भोलि (बिहीबार) स्वदेश फर्किँदै छन् ।
मोरिसस फुटबल महासङ्घले करिब दुई साताको नेपाल बसाइपछि टोली भोलि राति स्वदेश फर्किने जानकारी दिएको हो ।
