इङ्गलिस क्लब लिभरपुलका स्टार फरवार्ड साडियो माने चम्किँदा सेनेगल अफ्रिका कप अफ नेसन्सको फाइनलमा प्रवेश गरेको छ ।
बुधबार राति भएको पहिलो सेमिफाइनल खेलमा बुर्किना फासोलाई ३–१ गोलले हराउँदै सेनेगल उपाधि नजिक पुगेको हो ।
क्यामरुनमा बुधबार राति भएको खेलमा सेनेगलको जितमा एब्डोउ डिएलो, इड्रिसा गाना गुआइ र साडियो मानले गोल गरे ।
मानेले एक असिस्टसमेत दिए । बुर्किना फासोका इब्राहिमा ब्लाटी टाउरेले एक गोल फर्काए ।
निर्धारित समयको खेल सकिन २० मिनेट बाँकी छँदा चार गोल भएको थियो ।
१७ मिनेटको अन्तरमा चार गोल भएपछि खेल रोमाञ्चक बनेको थियो ।
खेलको ७०औं मिनेटमा एब्डोउ डिएलोले गोल गर्दै सेनेगललाई सुरुवाती अग्रता दिलाए ।
७६औं मिनेटमा इड्रिसा गाना गुआइले मानेको पासमा गोल गर्दै सेनेगलको अग्रता दोब्बर पारे ।
८२औं मिनेटमा इब्राहिमा ब्लाटी टाउरेले गोल गर्दै बुर्किना फासोलाई खेलमा फर्कने सङ्केत दिएका थिए ।
तर मानेले ८७औं मिनेटमा इस्माइला सारको पासमा गोल गर्दै टोलीको जित सुनिश्चित गरे ।
यससँगै सेनेगल उपाधि नजिक पुगेको छ ।
यसअघि क्वार्टरफाइनलमा इक्वाटोरियल गिनीमाथि ३-१ गोलको जित निकाल्दै सेनेगलले अन्तिम चारमा स्थान पक्का गरेको हो ।
बुर्किना फासो भने ट्युनिसियालाई १-० गोलले स्तब्ध पार्दै सेमिफाइनलमा पुगेको थियो ।
सेनेगल तेस्रो पटक अफ्रिका कप अफ नेसन्सको फाइनलमा प्रवेश गरेको हो ।
यसअघि सन् २००२ र २०१९ मा फाइनलमा प्रवेश गरेपनि उपाधि जित्न सकेको छैन ।
सेनेगलसँगको हारसँगै बुर्किना फासो दोस्रोपटक फाइनल पुग्नबाट बञ्चित बन्यो ।
बुर्किना फासो यसअघि २०१३ मा फाइनलमा प्रवेश गरेको थियो ।
उसले उपाधि भने जित्न सकेको छैन ।
अब, सेनेगलले फाइनलमा इजिप्ट र आयोजक राष्ट्र क्यामरुनबीचको विजेता टोलीसँग उपाधिका लागि खेल्ने छ ।
उपाधि भिडन्त ६ फेब्रुअरीमा हुनेछ ।
बुर्किना फासोले भने दोस्रो सेमिफाइनलमा पराजित टिमसँग तेस्रो स्थानका लागि खेल्ने छ ।
तेस्रो स्थानका लागि हुने खेल ६ फेब्रुअरीमै हुनेछ ।
सम्बन्धित समाचारहरू :
फाइनल प्रवेशका लागि सेनेगल र फासो भिड्दै
सेनेगल अफ्रिका कप अफ नेसन्सको सेमिफाइनलमा
अफ्रिका कप अफ नेसन्स : कप्तान सलाहको गोलमा इजिप्टको पहिलो जित
