अफ्रिकी कप अप नेसन्स (एफकन) अन्तर्गत आज पहिलो सेमिफाइनल खेल हुँदैछ ।
क्यामरूनस्थित याउन्डाे सहरमा रहेकाे अहमदौ अहिजो रङ्गशालामा हुने खेलमा सेनेगल र बुर्किना फासो आमनेसामने हुँदैछन् ।
नेपाली समय अनुसार राती १२ः४५ मा हुने खेलमा सेनेगल फासोलाई हराउँदै एफकनको फाइनल पुग्न चाहन्छ ।
प्रतियोगिताको ३३औं संस्करणमा आइपुग्दा समेत उपाधि जित्न नसकेको सेनेगल आजकाे खेलमा विजयी हुँदै फाइनलमा इहिास रच्न चाहन्छ ।
२०१९ मा सम्पन्न एपकनको उप–विजेता समेत रहेको सेनेगल २००२ मा फाइनल पुगे पनि उपाधि जित्न असफल बनेको थियो ।
यस पटकको प्रतियोगितामा उच्च लयमा देखिएको सेनेगलको आजको प्रतिद्वन्द्वी फासो पनि फाइनलको अनुभव लिइसकेको टोलीको हो ।
२०१३ मा दक्षिण अफ्रिकामा सम्पन्न एफकनको फाइनलमा नाइजेरियासँग १–० ले पराजित भएको फासो आफूले नै आयोजना गरेको १९९८ को एफकनमा चौथो स्थानमा सीमित बनेको थियो ।
अनुभवी टोली फासो र सेनेगलबीचको आजको भिडन्त निकै रोमाञ्चक हुनेछ ।
साडियो माने, एडवार्ड मेन्डी, कालिदो कुलिबाली, बौना सार, बौलाए दिया, आबदोउ डियाले जस्ता स्टार खेलाडीले भरिएको सेनेगललाई रोक्न फासो पनि तयार छ ।
आजको खेलमा फासोका लागि बट्र्रान्ड ट्राओरे, हर्वे कोफी, सिमाइला इयोटार सफल हुन्छन् कि हुँदैनन् ? त्यो हेर्न लायक हुनेछ ।
हालसम्म अपराजित सनेगेलले प्रतियोगिता अवधिभर एक गोल मात्रै खाएको छ ।
विपक्षीका पोस्टमा ६ गोल गरेको सेनेगलले क्वाटरफाइनलमा इक्वेटोरियल गिनीलाई ३–१ ले पराजित गर्दै फासोसँगको भेट पक्का गरेको थियो ।
यता फासोले भने प्रतियोगितामा हालसम्म चार गोल खाँदा समान चार गोल नै गरेको छ ।
अन्तिम १६ को खेलमा गाबोनविरुद्ध पेनाल्टीमा ७–६ को जित हात पारेको फासोले क्वाटर फाइनलमा ट्युनिसियालाई १–० ले स्तब्ध बनाएको थियो ।
आजको विजयी टोलीले एफकन २०२१ को उपाधि जित्न भोलि हुने क्यामरुन र इजिप्टबीचको खेलको विजेतासँग सोमबार खेल्नु पर्नेछ ।
